Май ойида Ўзбекистон чегарасини ноқонуний кесиб ўтишга уринган 48 киши қўлга олинди

Ўзбекистон чегара қўшинлари май ойида давлат чегарасини бузиб ўтган ва қиймати 372 миллион сўмни ташкил этувчи товарларни ноқонуний олиб ўтишга уринган 48 нафар қонунбузарни қўлга олди. Бу ҳақда Давлат хавфсизлиги хизмати чегара қўшинлари вакилига асосланиб, «Газета.uz» хабар берди.

Қозоғистон билан чегарада 25 нафар, Қирғизистон билан чегарада — 16 нафар, Тожикистон — 4 нафар ва Афғонистон билан чегарада 3 нафар қонунбузар қўлга олинган. Туркманистон билан чегарада эса май ойида ҳеч қандай қонунбузарлик қайд этилмаган.

Май ойида қўлга олинган барча товарлар Қирғизистон ва Тожикистон чегарасига тўғри келади. Ушбу товарларни асосан, дори воситалари, тамаки маҳсулотлари, электр лампалар, шунингдек, йирик шохли чорва моллари ташкил этган.

3 май куни Фарғона туманининг чегара яқинидаги Гулпиён аҳоли пунктида 197 миллион сўмлик дори воситаларини олиб ўтишга уринганлар ушланган.

9 май куни чегарачилар Тошкент вилоятидаги Ўратепа пункти орқали 50 миллион сўмлик тамаки маҳсулотларининг ноқонуний олиб кирилишини олдини олган.

24 май куни Наманган вилоятининг Мамай Янгиқўрғон чегара пунктида Қирғизистондан ноқонуний равишда йирик шохли молларни олиб киришнинг олди олинган.

Чегара бузувчиларга нисбатан Ўзбекистон қонунчилиги доирасида чора кўрилди, ушланган товар-моддий бойликлар давлат ҳисобига ўтказилди.