Toshkentda “Islom madaniyati ravnaq topgan yurt” nomli ko‘rgazma ish boshladi

Toshkentda “Islom madaniyati ravnaq topgan yurt” nomli ko‘rgazma ish boshladi. Bu haqda “Xalq so‘zi” xabar bermoqda.

Madaniyat vazirligi, Badiiy Akademiya, Din ishlari bo‘yicha qo‘mita, “Hunarmand” uyushmasi va qator tashkilotlar hamkorligida tashkil etilgan ko‘rgazmada Habibullo Solih, Islom Mamatov, Farhod Ahmadjonov, Xayrulla Lutfullayevning hattotlik, Abdurahim Mo‘minovning yog‘och o‘ymakorligi, Avaz Ulug‘bekovning pichoqchilik, O‘rinboy Ibragimovning milliy qo‘g‘irchoqbozlik, Kamoliddin Abdullayevning naqqoshlik san’ati ishlari namoyish etilmoqda.

Tadbir doirasida asrlar davomida shakllanib, rivoj topgan milliy hunarmandchilik mahsulotlari, islom dini bilan uyg‘unlikda shakllangan an’analar namoyish etiladi.

Shuningdek, ko‘rgazmada tashrif  buyuruvchilar milliy hunarmandchilik tarixi, islom dinining milliy madaniyat va san’atga ta’siri haqida atroflicha ma’lumot olishi mumkin. Ko‘rgazma 12-iyunga qadar davom etadi.