Avvalroq Oltiariqning “Iftixor” futbol klubi direktori Ahror Ergashev hamda katta murabbiy Nodir Qo‘ziboyev jamoa futbolchilariga nisbatan tajovuzkor xatti-harakatlari sabab futbol faoliyatidan butunlay chetlashtirilganligi haqida xabar berilgandi.
Keyinroq bir qator OAVlarda O‘FA vaziyatni yaxshi bilmay turib qaror chiqargani borasida xabarlar tarqaldi. PFL bu xabarlarni rad etdi.
Ta’kidlanishicha, “Iftixor” klubi futbolchilari Hasanboy Ergashev hamda Tursunboy Husanov bilan bog‘liq vaziyatdan PFL O‘FA rahbariyatini xabardor qilgan hamda tashkilotning Futbol faoliyatini nazorat qilish boshqarmasining ikki xodimi — Dilshod Saidmurodov hamda Jo‘rabek Sabdarov Farg‘onaga jo‘natilgan.
Ular Farg‘onada birinchi bo‘lib jabrlanuvchi Hasanboy Ergashev bilan uning uyida uchrashgan va bo‘lib o‘tgan voqeaga oydinlik kiritgan. Tursunboy Husanov esa o‘z shahri Shahrixonga jo‘nab ketgani uchun, u bilan suhbat telefon orqali bo‘lib o‘tgan.
Shundan so‘ng O‘FA xodimlari Oltiariq tumani IIB huzuridagi Tergov bo‘limi mas’ullari bilan, tuman IIB boshlig‘i, shuningdek, Farg‘ona viloyati hokimi o‘rinbosari bilan suhbatda bo‘lgan. Qayd etilishicha, ayni damda O‘FA Oltiariq tuman IIB mas’ul xodimlari bilan aloqada bo‘lib turibdi.
Farg‘onada O‘FAning ikki vakili “Iftixor” katta murabbiyi Nodir Qo‘ziboyev va klub direktori Ahror Ergashev bilan ham uchrashgan. Ular bo‘lib o‘tgan voqeada ishtirok etganini tan olgan. Ma’lum bo‘lishicha, futbolchilarni Oltiariq tumani chekkasidagi oromgohga telefon orqali Nodir Qo‘ziboyev chaqirtirgan. O‘zboshimcha tazyiqni Ahror Ergashev olib borgan va har ikki futbolchiga tan jarohati yetkazgan.
O‘FA o‘rganishlardan so‘ng “Iftixor”ning har ikki rahbarini futboldan butunlay chetlashtirgan. Endilikda IIB mazkur ish yuzasidan tergov surishtiruv ishlarini davom ettirmoqda, deyiladi xabarda.
Shuningdek, avvalroq “Gazeta.uz” agar futbolchilar klub rahbarlari tomonidan do‘pposlangani o‘z isbotini topsa, Yoshlar ittifoqi “Iftixor”dan voz kechishi mumkinligi haqida yozgan edi.
Izoh (0)