O‘zbekistonda ayollar uchun “Mo‘minalar” jurnali chop etila boshladi

O‘zbekiston musulmonlari idorasi tomonidan “Movarounnahr” nashriyoti muassisligida ayollar uchun “Mo‘minalar” jurnali chop etila boshladi. Bu haqda O‘zA xabar bermoqda.

O‘zbekiston musulmonlari idorasi raisi, muftiy Usmonxon Alimovning “Mukarramlik nasib etsin!” tabrik-maqolasi bilan ochilgan jurnalda din ahkomlari, ayollarga xos hukmlar maxsus ruknlarda tushunarli bayon etilgan.

“Diniy bilimlar hayotning hamma jabhalarida hardoim hammamizga to‘g‘ri yo‘l ko‘rsatadi. Muqaddas oila qo‘rg‘onini mustahkam saqlab, farzandlarini halol-u pok, insof-diyonatli, xalqparvar, vatanparvar qilib voyaga yetkazgan, erlarini sadoqat, mehr-u oqibat, tadbirkorlig-u tejamkorlik bilan qo‘llab-quvvatlagan momolarimiz, onalarimizning hayoti bu fikrimizning isbotidir. Zero, Islom dini ta’limotlariga amal qilib yashashni ikki dunyo saodati deb bilgan ajdodlarimiz o‘z zurriyotlariga diniy ta’lim-tarbiya berganlar. ‘Mo‘minalar’ jurnali, o‘ylaymizki, hammamiz uchun kutilgan ilm-u ma’rifat chashmasi, tarbiyachi muallima, chiroyli fazilatlar-u yaxshi ibratlar maktabi bo‘ladi. Uning nishona soni – birinchi qadami qutlug‘ va xayrli oqibatlarga debocha bo‘lishini tilayman”, — deyiladi O‘zbekiston Respublikasi Bosh vaziri o‘rinbosari, Respublikasi Xotin-qizlar qo‘mitasi raisi Tanzila Norboyevaning “Hammamiz kutgan jurnal” sarlavhali maqolasida.