Fuqaro taklifi: “Alimentni ham ota, ham ona to‘lashini joriy qilish kerak”
May oyining oxirgi o‘n kunligida O‘zbekiston Respublikasi Oliy Majlisi Qonunchilik palatasi deputatlari va Senati a’zolaridan iborat ishchi guruhi Namangan viloyatining Norin tumanida bo‘lib, aholi vakillari bilan bevosita muloqot qildi, deb yozadi O‘zA.
Foto: Flickr
Jumladan, ishchi guruhi tarkibidan o‘rin olgan O‘zbekiston “Milliy tiklanish” demokratik partiyasi fraksiyasi a’zolari Akmal Rahmonov, Shuhrat To‘xtaboyev va Nodirjon Muxtorov ham odamlarning turmush darajasini oshirishga halaqit berayotgan muammolar, fuqarolarni o‘ylantirayotgan masalalarni ijobiy hal etishga yaqindan ko‘maklashdi. Quyi parlament vakillariga xalq deputatlari tuman Kengashi deputatlari, mahalliy davlat hokimiyati organlari va tegishli tashkilotlar mas’ul xodimlari hamrohlik qildi.
Xususan, Oliy Majlis Qonunchilik palatasi deputati Nodirjon Muxtorov tuman hokimi sektori hududiga tegishli Qo‘rg‘ontepa qishlog‘idagi mahallalardagi aholi xonadonlarida fuqarolar bilan yuzma-yuz muloqotda bo‘ldi. Ularning shikoyatlari, talab va takliflari tinglandi.
Deputat Nodirjon Muxtorovga turli yo‘nalishlar bo‘yicha murojaat qilgan fuqarolar jamiyatda kechayotgan islohotlar, xususan O‘zbekiston Respublikasi Oliy Majlisi Senatining to‘y va marosimlarni tartibga solishga qaratilgan qarori loyihasi, oilalarning ahil va totuvligini ta’minlash, ajrimlarning oldini olish borasida ham bir qator o‘rinli taklif va mulohazalarini bildirdi.
Tanzila Qosimovaning aytishicha, keyingi paytlarda to‘y va ma’rakalarni o‘tkazishda “kim o‘zarga” qabilida ish tutishdek illatlarga yo‘l qo‘yilmoqda. Ayniqsa, o‘ziga to‘q xonadonlardagi dabdabaga berilishdan “o‘rnak” olayotgan o‘rtahol oilalarda to‘ydan keyin turli ko‘ngilsiz holatlar yuzaga kelmoqda. Senat qarori loyihasida qayd etilgan vazifalarga og‘ishmay amal qilish kelgusida bunday kamchiliklarni bartaraf etilishida ayni muddao bo‘ladi.
Vasila Karimovaning aliment masalasida bildirgan taklifi e’tiborga molik.
– Bugungi kunda alimentning faqatgina otalardan undirilishi barchaga ma’lum. Taklifim alimentni ham ota, ham ona to‘lashini joriy qilish kerak. Bu mablag‘larni bolalari uchun jamg‘arish kerak, – deydi u.
Fuqarolar tomonidan bildirilgan bu kabi o‘nga yaqin taklif-mulohazalarni tinglagan Nodir Muxtorov bu masalalarni parlament quyi palatasida muhokama uchun olib chiqishini ma’lum qildi.
Izoh (0)