Самарқанд шаҳридаги 77 та кўп қаватли уйда 227 та лифт мавжуд. Уларнинг аксариятида узоқ йиллардан бери лифт ишламайди, деб ёзади «Zarnews.uz». Лифтларнинг носоз ҳолга келиб қолганига 20 йилдан ошди. Бу вақт давомида деярли ҳар йили лифтлар таъмирланади ва яна бузилаверади. Бугунги кунга келиб эса ана шу лифтларнинг барчаси янгиланиши шарт бўлиб қолди.
Шу йилнинг 17—18 март кунлари давлат раҳбари вилоятга ташриф буюрганида бу масала ҳам тилга олиниб, 2019—2020 йилларда мавжуд лифтларнинг барчаси янгиланиши лозимлиги белгилаб берилди.
— Лифтларни таъмирлашга озмунча пул ажратмадик, – дейди «Илғор келажак сари» уй-жой мулкдорлари ширкати раиси Воҳид Назаров. – Мисол учун, «Уй-жой таъмир» корхонасига ҳар бир лифт таъмири учун ўртача 23 миллион сўмдан пул бердик. Аммо кўп ўтмай бузилиб қолмоқда.
– Ҳозирги кунда бир дона замонавий лифтнинг нархи 160 миллион сўмгача, – дейди вилоят уй-жой, коммунал хўжалик бошқармаси бўлим бошлиғи Шуҳрат Нурбеков. – Гарчи вилоятдаги мавжуд лифтларнинг барчаси ҳам маънан, ҳам моддий томондан эскириб кетган бўлса-да, шу вақтгача эътиборсиз қолиб келган. Энди бу соҳа энг долзарб масалалардан бирига айланди. Шу йилнинг ўзида ишламай турган 65 та лифт таъмирланади. Келгуси йилдан бошлаб лифтлар янгисига алмаштирилади.
Уй-жой мулкдорлари ширкати ходими Шавкат Аҳмедовнинг сўзларига кўра, аслида меъёр бўйича лифтлар 220 вольт кучланишли электр токида ишлаши керак. Аммо неча йилки, бундай кучланишнинг ўзи йўқ, 120—160 кучланиш мавжуд, холос.
– Жойларда электр энергиясидан фойдаланиш ҳажмининг ўсиши ёхуд тармоқларнинг эскириши ва бошқа сабаблар билан электр кучланиши камайиши мумкин, – дейди «Самарқанд электр тармоқлари» АЖ директорининг техник ишлар бўйича ўринбосари Элёр Мамасолиев. – Ходимларимиз бу бўйича ўрганиш ўтказиб, янгилаш лозим бўлган объектларни тақдим этишади ва шу асосда янгиланади. Аммо юқоридаги ҳолат бўйича на фуқаролардан ва на тегишли ташкилотлардан бирор мурожаат келган эмас.
Изоҳ (0)