Жанубий Корея президенти Мун Чже Ин 26 май, шанба куни Пханмунжом чегара пунктида КХДР етакчиси Ким Чен Ин билан учрашди. Бу ҳақда Жанубий Корея президенти матбуот хизмати хабар берди.
Расмий баёнотда қайд этилишича, икки мамлакат етакчилари 27 апрель куни имзоланган Пханмунжом декларациясининг бажарилиши ҳамда КХДР—АҚШ саммитини ўтказиш масалаларини муҳокама қилган.
Учрашув маҳаллий вақт билан 15:00 дан 17:00 гача (Тошкент вақти билан 11:00 дан 13:00 гача) давом этган. Хабар беришларича, музокаралар натижалари ҳақида эртага, 27 май куни расмий баёнот берилади.
Бу Шимол ва Жануб етакчиларининг сўнгги бир ой ичидаги иккинчи учрашувидир. Биринчиси ҳам Пханмунжом чегара пунктида бўлиб ўтган, у 27 апрель куни ўтказилган эди. Ўшанда томонлар музокаралар якуни бўйича тинчлик келишувини ишлаб чиқиб, уни имзолаган эди.
12 июнь куни Ким Чен Ин АҚШ президенти Дональд Трамп билан учрашиши кутилаётган эди, бироқ жорий ҳафта Трамп учрашувни бекор қилишини эълон қилди. Айни вақтда, АҚШ етакчиси келажакда учрашув бўлиб ўтиши мумкинлигини инкор этмаган эди.
Изоҳ (0)