Toshkent shahar hokimining o‘rinbosari — xotin-qizlar qo‘mitasi raisi Dilbar Najmutdinovaning navbatdagi tashrif hududi Sergeli tumanidagi 61-oilaviy poliklinika bo‘ldi, deb yozmoqda O‘zA.
Poliklinikada tashkil etilgan tadbirda aholi reproduktiv salomatligini mustahkamlash bo‘yicha Sergeli tuman tibbiyot birlashmasi tasarrufidagi oilaviy poliklinikalarning 2018-yil to‘rt oylik ish faoliyati hisoboti tinglandi.
Tumanda ro‘yxatga olingan homilador ayollar soni 2018-yilning to‘rt oyida 1679 nafarni tashkil etib, o‘tgan yilga nisbatan 187 nafarga oshgan.
Tumanda 2018-yilda qadar chaqaloqlar o‘limi o‘tgan yilga nisbatan ikkitaga oshga va o‘ntani tashkil qilgan, 1—18 yoshli bolalar o‘limi ham ikkitaga oshib, 13 taga yetgan. Bir yoshgacha bo‘lgan go‘daklar o‘limining barchasi tug‘ruqxonada sodir bo‘lgan.
Hokim o‘rinbosari bu o‘rinda tibbiyot mutaxassislarini o‘z vaqtida patronaj, tahlil ishlari o‘tkazilmaganlikda aybladi.
Tumanda 730 nafar nikohlanuvchi shaxsning tibbiy ko‘rikdan o‘tish vaqtida jami 18 ta ijtimoiy kasallik aniqlangan, ularning oltitasi ruhiy, uchtasi narkologik, beshtasi OITS va to‘rttasi boshqa kasalliklar bo‘lgan.
Mutaxassislar fikricha, bu muammoning sababi nikohlanuvchi shaxslar tibbiy ko‘rikdan to‘y kuniga sanoqli kunlar qolgandagina, hamma narsa tayyor bo‘lgach o‘tayotganidir.
Tanqidiy-tahlil ruhida o‘tgan yig‘ilish so‘nggida aholining reproduktiv salomatligini yaxshilash bo‘yicha tegishli takliflar berildi, kelgusidagi vazifalar belgilab olindi.
Izoh (0)