Koreya Respublikasi tashqi ishlar vaziri Kan Gyon Xva 16-may kuni amerikalik hamkasbi Maykl Pompeo bilan telefon orqali suhbatlashdi, deb yozadi “TASS”. Ular KXDRning Janubiy Koreya bilan yuqori darajadagi muzokaralardan voz kechishi masalasini muhokama qildi.
Kan Gyon Xva Pompeoni Seulning yuqori darajadagi muloqotning bekor qilinishiga nisbatan pozitsiyasi haqida xabardor qildi va Janubiy Koreyaning 27-aprel kuni Koreya Respublikasi va KXDR yetakchilari tomonidan imzolangan Pxanmunjom deklaratsiyasi nizomining bajarilishining “qat’iy tarafdorligi”ni tasdiqladi. Uning so‘zlariga ko‘ra, Seul Pxenyanning tez orada muzokaralar stoliga qaytishiga erishmoqchi.
Pompeo o‘z navbatida, Vashington 12-iyun kuni Singapurda o‘tkazilishi rejalashtirilgan AQSh va KXDR yetakchilari sammitiga tayyorgarlikni davom ettirishini, ammo Pxenyanning xatti-harakatlarini diqqat bilan kuzatishini ma’lum qildi.
Avvalroq Pxenyan oliy darajadagi KXDR—AQSh sammitida ishtirok etish bo‘yicha o‘z roziligini qayta ko‘rib chiqishi mumkinligi xabar berilgan edi. Bunday bayonot Pxenyanning Seul bilan oliy darajadagi uchrashuvni bekor qilish haqidagi qarori va Vashington bilan ham shunday yo‘l tutishi haqidagi tahdidlaridan keyin yangradi. KXDRning xavotiri Janubiy Koreya 15-apreldan buyon AQSh bilan hamkorlikda o‘tkazayotgan Max Thunder o‘quv mashg‘ulotlari bilan bog‘liq.
Izoh (0)