Корея Республикаси ташқи ишлар вазири Кан Гён Хва 16 май куни америкалик ҳамкасби Майкл Помпео билан телефон орқали суҳбатлашди, деб ёзади «ТАСС». Улар КХДРнинг Жанубий Корея билан юқори даражадаги музокаралардан воз кечиши масаласини муҳокама қилди.
Кан Гён Хва Помпеони Сеулнинг юқори даражадаги мулоқотнинг бекор қилинишига нисбатан позицияси ҳақида хабардор қилди ва Жанубий Кореянинг 27 апрель куни Корея Республикаси ва КХДР етакчилари томонидан имзоланган Пханмунжом декларацияси низомининг бажарилишининг «қатъий тарафдорлиги»ни тасдиқлади. Унинг сўзларига кўра, Сеул Пхеньяннинг тез орада музокаралар столига қайтишига эришмоқчи.
Помпео ўз навбатида, Вашингтон 12 июнь куни Сингапурда ўтказилиши режалаштирилган АҚШ ва КХДР етакчилари саммитига тайёргарликни давом эттиришини, аммо Пхеньяннинг хатти-ҳаракатларини диққат билан кузатишини маълум қилди.
Аввалроқ Пхеньян олий даражадаги КХДР—АҚШ саммитида иштирок этиш бўйича ўз розилигини қайта кўриб чиқиши мумкинлиги хабар берилган эди. Бундай баёнот Пхеньяннинг Сеул билан олий даражадаги учрашувни бекор қилиш ҳақидаги қарори ва Вашингтон билан ҳам шундай йўл тутиши ҳақидаги таҳдидларидан кейин янгради. КХДРнинг хавотири Жанубий Корея 15 апрелдан буён АҚШ билан ҳамкорликда ўтказаётган Max Thunder ўқув машғулотлари билан боғлиқ.
Изоҳ (0)