O‘zbekiston Prezidenti Shavkat Mirziyoyevning 2018-yil 12-may kuni Toshkent shahrida amalga oshirilayotgan bunyodkorlik ishlari bilan tanishish davomida bergan topshiriqlarida belgilangan vazifalarning bajarilishini ta’minlash maqsadida poytaxtda “Muammolar yechimi — harakatlar yakdilligida” guruhlarini tashkil etish va uning faoliyatini yo‘lga qo‘yish to‘g‘risida keng qamrovli qo‘shma qaror qabul qilindi. Bu haqda Toshkent shahar hokimligi axborot xizmati xabar bermoqda.
Toshkent shahar hokimligi, prokuraturasi, ichki ishlar bosh boshqarmasi, davlat soliq boshqarmasi, favqulodda vaziyatlar boshqarmasi, Milliy gvardiya va boshqa davlat idoralarining malakali mutaxassislari hamda jamoat tashkilotlarining 270 nafardan ortiq vakillaridan iborat bo‘lgan mazkur guruhlar bevosita mahallalarda uyma-uy yurib, oilalarning eng muhim muammolarini hal etishda ularga har tomonlama ko‘maklashish, hududlarda tadbirkorlikni rivojlantirish, aholi, ayniqsa yoshlar bandligini ta’minlash, sog‘lig‘ini saqlash, ijtimoiy muhofaza qilishga yo‘naltirilgan choralarni jadal amalga oshirishni ta’minlaydi.
Toshkent shahar hokimligidan 16 ta guruhlar bevosita xonadonlarda oilalarni o‘rganish, uy-joy kommunal va yo‘l xo‘jaligi, energiya, suv ta’minoti, hududlarni obodonlashtirish, ijtimoiy turmush tarzidagi mavjud muammolarni aniqlash hamda hal etish bo‘yicha aniq maqsadli tadbirlarni amalga oshirish maqsadida poytaxtning Sergeli, Uchtepa, Shayxontohur va Olmazor tumanlarida bo‘ldi.
O‘zaro muloqot chog‘ida aholi tomonidan ko‘tarilgan muammolarni tez va qisqa muddatlarda hal etish choralari ko‘rildi. O‘z o‘rnida shuni ta’kidlash joizki, bu guruhlar barcha tumanlarda mahallalarga borib, ijtimoiy himoyaga muhtoj barcha oilalarning turmush-tarzi bilan yaqindan tanishib, mavjud muammolarni o‘rganish va uning yechimini topishga kirishdi.
Jumladan, tezkor usulda ishlashni o‘z oldiga asosiy maqsad qilib qo‘ygan ushbu guruhlar tomonidan qisqa mudatda mahallalarga tashrif buyurilib, Olmazor tumanida 593 ta, Shayxontohur tumanida 578 xonadonlarning turmush tarzi o‘rganildi. Shuningdek, 104 ta ijtimoiy himoyaga muhtoj oila a’zolari bilan yaqindan muloqot qilindi.
Izoh (0)