Farg‘ona viloyati Uchko‘prik tumanida yollanma mehnat bilan shug‘ullanuvchi 24 yoshli S.F. tungi klubda raqs tushayotgan qizni kaltaklab, unga og‘ir tan jarohati yetkazdi. Bu haqda “Daryo” muxbiriga IIB tergov bo‘limi xabar berdi.
Ma’lumotga ko‘ra, S.F. ulfatlari bilan “Okean” oshxonasiga borib, oqshomgacha aroq ichadi. O‘zlarini boshqara olmaydigan darajada mast bo‘lishlariga qaramay ular “bazm”ni “Forsaj” tungi klubida davom ettiradi.
Klubda S.F. raqsga tushayotgan F. ismli qizga shilqimlik qilib, gap otadi. Nafsoniyatiga tegib, haqorat qiladi. Bunga javoban qiz uning yuziga tarsaki tushiradi. Ichkilik ta’sirida mast bo‘lgan S.F qizga ketma-ket musht tushiradi. Kaltak zarbidan o‘zini yo‘qotgan qiz boshi bilan yerga yiqiladi.Og‘ir tan jarohati olgan F. shifoxonaga keltirilganidan so‘ng ichki ishlar bo‘limi xodimlari tomonidan tergovga qadar tekshiruv harakatlari olib borilib, jabrlanuvchi sud tibbiy ekspertizasidan o‘tkazildi. Ekspertiza xulosasiga ko‘ra, jabrlanuvchi hayoti uchun xavfli bo‘lgan og‘ir tan jarohatlari olganligi aniqlandi.
Shunga ko‘ra, S. F qo‘lga olinib, unga nisbatan jinoyat ishi qo‘zg‘atildi.
Izoh (0)