Фарғона вилояти Учкўприк туманида ёлланма меҳнат билан шуғулланувчи 24 ёшли С.Ф. тунги клубда рақс тушаётган қизни калтаклаб, унга оғир тан жароҳати етказди. Бу ҳақда «Дарё» мухбирига ИИБ тергов бўлими хабар берди.
Маълумотга кўра, С.Ф. улфатлари билан «Океан» ошхонасига бориб, оқшомгача ароқ ичади. Ўзларини бошқара олмайдиган даражада маст бўлишларига қарамай улар «базм»ни «Форсаж» тунги клубида давом эттиради.
Клубда С.Ф. рақсга тушаётган Ф. исмли қизга шилқимлик қилиб, гап отади. Нафсониятига тегиб, ҳақорат қилади. Бунга жавобан қиз унинг юзига тарсаки туширади. Ичкилик таъсирида маст бўлган С.Ф қизга кетма-кет мушт туширади. Калтак зарбидан ўзини йўқотган қиз боши билан ерга йиқилади.Оғир тан жароҳати олган Ф. шифохонага келтирилганидан сўнг ички ишлар бўлими ходимлари томонидан терговга қадар текширув ҳаракатлари олиб борилиб, жабрланувчи суд тиббий экспертизасидан ўтказилди. Экспертиза хулосасига кўра, жабрланувчи ҳаёти учун хавфли бўлган оғир тан жароҳатлари олганлиги аниқланди.
Шунга кўра, С. Ф қўлга олиниб, унга нисбатан жиноят иши қўзғатилди.
Изоҳ (0)