Bobomurod Abdullayev, Hayotxon Nasriddinov, Shavkat Olloyorov va Ravshan Salayev 7-may, dushanba kunni sud zalidan ozod qilindi. Ulardan uch nafari — Nasriddinov, Olloyorov va Salayev to‘liq oqlandi, sud ularga nisbatan jinoiy ishning to‘xtatilishini belgiladi, deb xabar beradi “Gazeta.uz”.
Bobomurod Abdullayevga nisbatan ayblov JKning 159-moddasi 4-qismidan (“Hokimiyatni bosib olish yoki O‘zbekiston Respublikasi konstitutsiyaviy tuzumini ag‘darib tashlash maqsadida fitna uyushtirish”) shu moddaning 3-qismi “b” bandiga o‘zgartirildi.
Sud uni aybdor deb tan olib, oylik ish haqining 20 foizini ushlab qolish sharti bilan uch yillik axloq tuzatish ishlariga hukm etdi. Bobomurod Abdullayev 221 kun hibsda tutib turilganini inobatga olgan holda, bu muhlat hisobdan chiqarib tashlandi. Shu tariqa, Bobomurod Abdullayev bir yildan ko‘proq axloq tuzatish ishlari bilan band bo‘ladi.
Bobomurod Abdullayev apellyatsiyaga bermasligini, sud qaroridan mamnunligini aytdi. U Prezidentga minnatdorlik bildirdi.
“Mamnunman. Bu yerdan tirik chiqqanimdan mamnunman. Ozodlikka chiqqanimdan xursandaman, majlis ochiq o‘tganidan xursandman. O‘ylaymanki, bu qaror Prezident tomonidan olib borilayotgan siyosatni liberallashtirish samarasidir. Prezidentga rahmat, sudga rahmat”, — dedi u.
Sud xususiy aniqlov chiqarib, unda O‘zbekiston Davlat xavfsizlik xizmatini tezkor xodimlar hamda Nodir To‘raqulov boshchiligidagi tergov guruhi a’zolari tomonidan yo‘l qo‘yilgan xatolarga e’tibor berishga chaqirdi. Hujjatda xizmat tekshiruvini o‘tkazib, Jinoiy-protsessual kodeksga qat’iy amal qilinishi bo‘yicha choralar ko‘rish lozimligi ta’kidlandi.
Izoh (0)