Ўзбекистон ва Туркманистон ўртасида 2007 йилда имзоланган Дўстона муносабатлар ва ҳар томонлама ҳамкорликни янада мустаҳкамлаш тўғрисидаги давлатлараро шартнома икки мамлакат ҳамкорлигининг мутлақо янги саҳифаларини очиб, давлатлар раҳбарларининг олий даражадаги самимий ва самарали мулоқотлари, халқлар ўртасидаги маданий-гуманитар алоқаларнинг доимий тус олишини таъминламоқда. Бу ҳақда журналист Шоира Бозорова фикр юритган.
Бу давлатлар ва халқлар ўртасидаги ўзаро ишончни мустаҳкамлашга, яхши қўшничилик, дўстона алоқаларнинг ривожланишига хизмат қилмоқда. Ўз ўрнида, Марказий Осиёда минтақавий хавфсизлик ва барқарорликни таъминлашга муҳим ҳисса қўшмоқда.
Президент Шавкат Мирзиёевнинг 2017 йил 6 мартдаТуркманистонга амалга оширган илк давлат ташрифи икки мамлакат ўртасидаги ҳар томонлама алоқаларнинг ўзаро ишонч, ҳурмат асосида намоён бўлишидан далолат беради. Гурбангули Бердимуҳамедов Шавкат Мирзиёев Ўзбекистон Президенти этиб сайланганидан кейин давлат ташрифи билан биринчи бўлиб Туркманистонга келгани учун миннатдорлик билдириб, бу тарихий воқеа мамлакатлар ҳамкорлигида фойдаланилмаган имкониятларни ишга солиш ва алоқаларни янада мустаҳкамлашга хизмат қилишини алоҳида қайд этган эди.
Қолаверса, Туркманистонда Ўзбекистоннинг Биринчи Президенти ҳайкали тиклангани ҳам икки халқ бир-бирининг атоқли вакилларини нечоғли ардоқлашини кўрсатиб турибди.
Жорий йилнинг 23 апрель куни Гурбангули Бердимуҳамедовнинг Ўзбекистонга амалга оширган давлат ташрифи икки томонлама муносабатларда янги саҳифа очилишига янада мустаҳкам замин яратмоқда.
Хусусан, Ўзбекистонга Каспий қирғоғи порт инфратузилмасидан фойдаланиш имкониятларини ўрганиб чиқиш таклиф этилгани, Ўзбекистон – Туркманистон – Каспий денгизи – Жанубий коридор йўналиши бўйича йўлак яратишга қаратилган қўшма ишларга тайёрлик билдирилгани, Марказий Осиё – Яқин Шарқ транзит коридорини ташкил этиш бўйича ишларни реализация қилиш ёқлангани Ўзбекистоннинг жаҳон бозорига чиқишида янада кенг имкониятлар яратилишида муҳим омил бўлиб хизмат қилади.
Икки қардош давлат ўртасидаги алоқларнинг мустаҳкамланишида маданий соҳада амалга оширилаётган ишлар ҳам алоҳида эътиборга сазовор. Икки давлат раҳбарлари иштирокида Тошкент шаҳрида очилган «Ашхобод сайилгоҳи» мамлакатлар ўртасидаги маданий алоқалар истиқболини белгиловчи амалий ифода бўлди.
Изоҳ (0)