Toshkent axborot texnologiyalari kasb-hunar kolleji (TATKHK) negizida amalga oshirilgan “Innovatsion servis akademiyasi” ijtimoiy loyihasining II fazasi yakunlandi. Akademiyani mobil telefonlar va raqamli televizorlarni tuzatish laboratoriyasi, o‘n sakkizta zamonaviy payvandlash stansiyalari va komplektlovchi qismlar bilan qo‘shimcha jihozlash uning yakuniy bosqichidan iborat bo‘ldi. Shuningdek mazkur yakuniy faza doirasida laboratoriyalar zamonaviy raqamli texnikaga servis texnik xizmat ko‘rsatish uchun bir yilga yetdigan ehtiyot qismlar bilan ta’minlandi.
Eslatib o‘tamiz, “Innovatsion servisnaya akademiyasi” loyihasining birinchi fazasi 2015-yilda amalga oshirilgan edi va keyingi uch yil ichida loyiha takomillashtirildi, qo‘shimcha jihozlash va rivojlantirishning bir nechta bosqichlari o‘tkazildi. Toshkent axborot texnologiyalari kasb-hunar kolleji, SamsungElectronicsCentralEurasia hamda O‘zbekiston ekologiya harakati va Markaziy Osiyo mintaqaviy ekologiya markazi (MOMEM) o‘rtasida imzolangan Hamkorlik to‘g‘risidagi memorandum ushbu ijtimoiy-ma’rifiy loyihani hayotga tadbiq etishning asosiga aylandi. MOMEMning vazifasi “yashil” texnologiyalarni tarqatishga ko‘maklashish hamda ta’lim jarayoni uchun modullar va zamonaviy yondoshuvlarni tayyorlashda ishtirok etishdan iborat edi.“Uch yil muqaddam TATKHK o‘z hududidan ikkita laboratoriya, o‘quv laboratoriyasi va yordamchi xona uchun bino ajratdi, bu esa SamsungElectronicsCentralEurasianing innovatsion akademiya yaratish bo‘yicha loyihasini amalga oshirish, shuningdek kasb-hunar texnik ta’limi dasturiga smartfonlar va raqamli televizorlarni ta’mirlash bo‘yicha yangi o‘quv kurslarini hamda yo‘nalishga oid o‘quv modullarini joriy etish imkonini berdi, – deydi loyiha menejeri Tatyana Shokirova (MOMEM). – 2018 yilning mart oyi oxirida loyiha o‘z yakuniga yetdi, ammo biz uning natijalari barqaror va muqim ekaniga aminmiz. O‘tgan vaqt ichida hamkorlarning birgalikdagi sa’y-harakatlari bilan aprobatsiya qilingan va kam-ko‘sti to‘ldirilgan texnik va metodik baza bundan keyin ham kollejga O‘zbekiston bozorida talab katta bo‘lgan axborot-kommunikatsiya tenologiyalari sohasida yangi ixtisosliklarni rivojlantirish va yangi mutaxassislar tayyorlash imkonini beradi”.
Tashabbusning ijtimoiy yo‘naltirilgan vazifasi haqida loyihaning boshlanish bosqichidayoq Samsung Electronics Central Eurasianing O‘zbekistondagi vakolatxonasi rahbari Min Shin Vung ta’kidlab o‘tgan edi: “Bizning loyihamizda ishtirok etish yoshlarga o‘zlarining tayanch bilimlarini kengaytirish va mehnat bozorida salmoqli raqobatbardosh afzalliklarga ega bo‘lish imkonini beradi, degan umiddamiz”.
Xulosa qilamiz. “Innovatsion servis akademiyasi” loyihasi Toshkent axborot texnologiyalari kasb-hunar kollejiga nima berdi?
1. Loyiha TATKHK o‘quv dasturiga yangi, talab katta bo‘lgan ixtisosliklarni joriy etish imkonini yaratdi.
Har yili ikki mingdan ortiq o‘quvchilarga tahsil beradigan va ikki yuzdan ziyod o‘qituvchilar saboq beradigan kollej avvaliga ikkita asosiy - “Informatika va axborot texnologiyalari” hamda “Telekommunikatsiya” yo‘nalishlarini rivojlantirib kelayotgan, kommunikatsiya va multimediya tizimlarini ekspluatatsiya qilish, dasturiy ta’minot, kompyuter va kompyuter tarmoqlarini ta’mirlash va sozlash, peredacha tizimlarini ekspluatatsiya qilish va yig‘ish bo‘yicha mutaxassilarni tayyorlayotgan edi. “Innovatsion servis akademiyasi” loyihasi doirasida O‘zbekistondagi bironta o‘quv muassasasida ta’lim berilmaydigan yana ikkita dolzarb bo‘lgan ixtisosliklar kollejda paydo bo‘ldi, bular: “Mobil telefonlar ta’miri” va “Raqamli televizorlarga xizmat ko‘rsatish” yo‘nalishlaridir.
Tatyana Ovchinnikova, o‘quv-ishlab chiqarish ishlari bo‘yicha direktor o‘rinbosari:
– Smartfonlar va zamonaviy televizorlarni ta’mirlash bo‘yicha yangi ixtisosliklar TATKHKda avvaldan mavjud bo‘lgan “Mobil aloqa” va “Raqamli televideniye” o‘quv kurslari negizida joriy etildi. Taqdim etilgan uskunalar ushbu yo‘nalishlar bo‘yicha amaliy mashg‘ulotlar o‘tkazish imkonini yaratdi. Loyiha mobaynida o‘quv dasturining kam-ko‘sti to‘ldirildi, bir necha bor takomillashtirildi. Hozirda ikkinchi va uchinchi bosqich o‘quvchilariga yil mobaynida “Innovatsion servis akademiyasi”ning “Raqamli televizorlarni ta’mirlash” ixtisosligi bo‘yicha mashg‘ulotlarga nazariya uchun 60 soat va amaliyot uchun 140 soat, shuningdek “Mobil aloqa uskunalarini ta’mirlash” ixtisoslashuvi bo‘yicha nazariya uchun 60 soat hamda amaliyot uchun 120 soat ajratilmoqda. Har bir bosqich uchun alohida metodik qo‘llanmalar ishlab chiqilgan. Agar ikkinchi bosqich o‘quvchilarida telefon va televizorlarni yig‘ish, qismlarga ajratishga katta e’tibor qaratilayotgan bo‘lsa, uchinchi bosqichdagilar uchun yanada chuqurlashtirilgan dastur ko‘zda tutilgan: buzuqliklarni diagnostika qilish va tuzatish, qismlarni almashtirish va boshqalar.
2. Loyiha kollejni amaliy mashg‘ulotlar uchun moddiy-texnik baza bilan ta’minladi.
Loyiha doirasida ikkita laboratoriya, o‘quv auditoriyasi va qo‘shimcha xona ta’mirlandi va to‘liq jihozlandi. Laboratoriyalar barcha zarur zamonaviy ta’mirlash-diagnostika qilish uskunalari, ehtiyot qismlar hamda amaldagi mobil gadjetlar hamda raqamli televizorlar bilan ta’minlandi, ularda o‘quvchilar o‘z bilim va malakalarini oshirishlari mumkin.
Akmal Hoshimov, o‘qituvchi:
– Akademiyamizda o‘quvchilar nafaqat maketlar va sinov platalarida, balki haqiqiy mobil telefonlar hamda raqamli televizor bilan ishlashlari mumkin. Ta’mirlash va diagnostika ishlari uchun biz barcha yaxshi jihozlangan zamonaviy servis markazlarida qo‘llaniladigan raqamli o‘lchov uskunalari, payvandlash stansiyalari, ossillograflar va boshqa zamonaviy asboblardan foydalanamiz. TATKHK bitiruvchilari orasida mobil telefonlar va raqamli televizorlar mavzulari bo‘yicha diplom ishlarini himoya qilgan o‘quvchilar ham bor. Albatta, raqamli texnologiyalar olami o‘zgaruvchan, ammo biz o‘zgarishlarni kuzatib boramiz, o‘quv dasturining texnik jihatlarini ularga moslashtirishga harakat qilamiz. Real amaliy mashg‘ulotlar bilan mustahkamlangan bunday salmoqli ta’lim bazasini olgandan keyin o‘quvchilarning raqamli soha o‘zgarishlariga moslashishi osonroq kechadi.
3. Loyiha mutaxassislari ekologik masalalar prizmasi orqali texnologiyalar olamiga yangicha yondoshuvni taqdim etishdi.
“Innovatsion servis laboratoriyasi” loyihasi doirasida o‘qituvchilar va o‘quvchilarning “yashil” texnologiyalar, energiya samaradorligi, resurslarni asrash va atrof-muhitni himoya qilish masalalari yuzasidan savodxonligini oshirishga katta e’tibor qaratildi. Ekologik yondoshuv bu yerda nafaqat nazariy, balki amaliy jihatdan ham tadbiq etilmoqda.
Dmitriy Li, TATKHK direktori:
– Akademiya dasturida komponent ta’mirlash sohasi o‘rganiladi, unda modul ta’mirlashdan farqli o‘laroq, bir butun plata emas balki uning ishlamayotgan qismlari almashtiriladi. Bu mutaxassisdan quntli mehnatni talab etadi, ammo xizmat iste’molchilari uchun ta’mirlash ishlarini deyarli 90 foizga arzonlashtirish imkoniyatini yaratadi. Ammo eng asosiysi – u ekologik tarkibiy qismga ega, zamirida kelajak uchun qayg‘urish g‘oyasi mujassam. Chunki, ishlamaydigan modullarni utilizatsiya qilish, u texnologik jihadan har qancha mukammal bo‘lmasin, ekologiyaga ta’sir ko‘rsatmay qolmaydi. Har bir komponent ta’mirlash esa utilizatsiyani bir o‘lchov birligiga kamaytiradi. Kuniga bitta servis markazi qancha miqdorda mobil ta’mirlashni amalga oshirishini hisoblab chiqish qoldi, agar ushbu raqamni shahardagi, mamlakatimizdagi servis-markazlar soniga ko‘paytirilsa, yildagi barcha ish kunlari yig‘indisi bunga qo‘shilsa, ancha salmoqli raqam kelib chiqadi. Shu sababli ishonch bilan aytishimiz mumkinki, bizning akademiya – bu atrof-muhit va ekologiyani himoya qilish sari qo‘yilgan dadil qadamdir.
Ta’kidlash kerakki, “Samsung innovatsion servis akademiyasi” loyihasi O‘zbekiston va Qozog‘istonda bir vaqtda amalga oshirildi, bu esa o‘rta maxsus va kasb-hunar texnik ta’limi borasida o‘zaro tajriba almashish uchun imkoniyatlar eshiklarini ochdi.
Shuningdek, 2018-yilning fevral oyida Toshkent shahrida loyiha doirasida axborot-kommunikatsiya texnologiyalari mutaxassislari, Oliy va o‘rta-maxsus ta’lim vazirligi vakillari hamda TATKHK, Toshkent radiotexnika va avtomatika kasb-hunar kolleji, Toshkent telekommunikatsiya texnologiyalari kasb-hunar kolleji, Mirzo Ulug‘bek informatika kasb-hunar kolleji, Yunusobod va Yashnobod tumanlari kompyuter texnologiyalari kasb-hunar kolleji rahbarlari, o‘qituvchilari va o‘quvchilari ishtirokidagi davra suhbati o‘tkazildi.
Davra suhbatiga taklif etilgan AKTga ixtisoslashgan kollejlar vakillariga murojaat qilar ekan SamsungElectronicsCentralEurasia vakili Berik Umarov loyihaning metodik qismi bilan bo‘lishishga tayyor ekanini bildirdi. Keyingi kun, 2018 yilning 8 fevralida kollej mutaxassislari uchun treninglar tashkil etildi, xususan ular quyidagi mavzularga bag‘ishlandi: “Smartfonlar ta’mirining chuqurlashtirilgan kurslari bo‘yicha trening”; “Televizorlar ta’mirining chuqurlashtirilgan kurslari bo‘yicha trening” hamda “Atrof-muhitni asrash va barqaror rivojlanish” chuqurlashtirilgan kursi bo‘yicha trening».
Loyiha hamkorlari haqida ma’lumot:
www.tpkit.uz www.samsung.uzwww.global.samsungtomorrow.com www.carececo.org www.eco.uz
Izoh (0)