Kolumbiyaning Kali shahrida 21-avgust kuni avtomobil portlashi oqibatida 5 kishi halok bo‘ldi, 36 nafar fuqaro jarohat oldi. Bu haqda BBC xabar berdi.
Portlash shaharning shimoliy qismida joylashgan Marko Fidel Suares harbiy aviatsiya maktabi yaqinida yuz bergan. Politsiya dastlabki ma’lumotlarga tayanib, 36 nafar fuqaro turli darajadagi tan jarohatlari olganini bildirgan. Kali meri Alexandro Eder hodisani qoralab, hujum ortida turgan shaxslarga oid ma’lumot berganlarga mukofot va’da qilgan.
Portlashdan bir necha soat oldin, Medelin shahri yaqinidagi qishloq hududida politsiya vertolyoti hujumga uchragan. Rasmiylarga ko‘ra, hodisa oqibatida kamida 12 kishi halok bo‘lgan. Ikkala hujumdan so‘ng Kolumbiya prezidenti Gustavo Petro va harbiy rahbariyat fuqarolar xavfsizligini ta’minlash maqsadida maxsus xavfsizlik kengashini tuzgan.
“Mamlakat terrorchilik oldida chekinmaydi. Bunday jinoyatlar qonuniy tartibda qat’iy jazolanadi”, deyiladi Kolumbiya Mudofaa vazirligi bayonotida.
Guvohlarga ko‘ra, Kali shahridagi portlashda ko‘chadagi fuqarolar halok bo‘lgan, yaqin atrofdagi ko‘plab uylar zararlangan. Voqea joyi yaqinidagi maktablar va binolar ichidagi odamlar evakuatsiya qilingan. Shuningdek, shaharga katta yuk mashinalarining kirishi vaqtincha taqiqlangan.
Kolumbiya Mudofaa vaziri Pedro Sanches portlashni “terrorchilik hujumi” sifatida baholab, bu ish ortida “Mordisko” nomli narkokartel turganini bildirmoqda. U bu nom bilan sobiq “FARC” guruhining hozirda faol bo‘lgan yetakchilaridan biri, Ivan Mordiskoni nazarda tutgan.
“Bu narkotrafikka qarshi kurashda jamoaviy yutuqlarimizga berilgan vahshiy va shafqatsiz javobdir. Davlat bu xatti-harakatlarni shunday qo‘yib qo‘ymaydi”, dedi Sanches.
Prezident Gustavo Petro politsiya vertolyotiga uyushtirilgan hujumga alohida to‘xtalib, samolyot kokainning asosiy tarkibiy qismi bo‘lgan koka barglarini yo‘q qilish vazifasini bajarrish uchun ketayotganini bildirgan. Ma’lumotlarga ko‘ra, vertolyot dron orqali nishonga olingan va yerga qulab tushgan. Hujum oqibatida 12 nafar huquq-tartibot xodimi halok bo‘lgan, biroq ularning halok bo‘lishi portlash yoki qulash oqibatidami — hozircha noma’lum. Sanchesning aytishicha, ushbu hujum ortida “FARC” guruhining eng yirik bo‘linmasi hisoblangan “EMC” isyonchi guruhi turibdi.
Kolumbiyada so‘nggi oylarda xavfsizlik kuchlari bilan qurolli guruhlar, sobiq isyonchilar yoki narkokartellar o‘rtasidagi to‘qnashuvlar tez-tez ko‘zga tashlanmoqda. Ayniqsa, dron orqali uyushtirilayotgan hujumlar soni oshib bormoqda — 2024 yilda shunga o‘xshash 115 ta hujum qayd etilgandi.
Izoh (0)