O‘zbekiston Superligasi 20-turi doirasidagi yana ikkita uchrashuv yakuniga yetdi. Ulardan biri Farg‘onada bo‘lib o‘tgan bo‘lsa, yana biriga Qarshidagi “Markaziy” stadion mezbonlik qildi.
O‘zbekiston Superligasi
20-tur
“Neftchi” — “Mash’al” 3:0
Gollar: 1:0 — Kojo (34), 2:0 — G‘ofurov (63), 3:0 — Kojo (70)
Superliga 20-turidan o‘rin olgan markaziy uchrashuvlardan biri Farg‘onadagi “Istiqlol” stadionida bo‘lib o‘tdi. Unda mezbon “Neftchi” jamoasi Muborakning “Mash’al” klubini qabul qildi va yirik — 3:0 hisobida zafar quchdi.
Uchrashuvdagi hisob 34-daqiqada farg‘onaliklarning qirg‘izistonlik legioneri Joel Kojo tomonidan ochildi. Bu gol hujumchi uchun “Neftchi” safidagi debyut goli bo‘ldi.
Ikkinchi bo‘limda “Neftchi” hujumlarni yanada kuchaytirdi va 63-daqiqada tajribali himoyachi Anvar G‘ofurov jamoaning ikkinchi goliga mualliflik qildi. Oradan 7 daqiqa o‘tib, Joel Kojo o‘z hisobiga dublni rasmiylashtirib, yakuniy hisobni o‘rnatdi — 3:0.
Mazkur natija o‘yin yakuniga qadar o‘zgarmadi. Ushbu g‘alabadan so‘ng “Neftchi” 42 ochko jamg‘argan holda onlayn turnir jadvalida peshqadamlik qilmoqda. “Mash’al” esa 18 ochko bilan 14-o‘rindan joy olgan.
O‘zbekiston Superligasi
20-tur
“Buxoro” — “Qo‘qon-1912” 1:0
Gol: 1:0 — Tabatadze (70)
O‘zbekiston Superligasining 20-turidan o‘rin olgan navbatdagi uchrashuv Qarshidagi “Markaziy” stadionda bo‘lib o‘tdi. Unda “Buxoro” jamoasi “Qo‘qon-1912”ni qabul qilib, 1:0 hisobida g‘alaba qozondi.
Keskin va murosasiz kechgan bellashuvdagi yagona gol 70-daqiqada Toma Tabatadze tomonidan urildi. Gruziyalik hujumchi Azizbek Omonovning zarbasini darvoza tomon burib, jamoasiga g‘alaba keltiruvchi golga mualliflik qildi.
Mazkur natijadan so‘ng “Buxoro” ochkolar sonini 17 taga yetkazdi va turnir jadvalida 15-pog‘onaga ko‘tarildi. 18 ochkoga ega “Qo‘qon-1912” esa 13-o‘rinda bormoqda.
Izoh (0)