Kecha, 23-aprel sanasida “Sports.uz” nashri “Nasaf” futbol maktabining 2002-yilda tug‘ilgan tarbiyalanuvchilari ota-onalar kengashi raisi Baxtiyor Norqobilovning murojaatini e’lon qilgandi.
Unda Qarshidagi futbol akademiyasi ish faoliyati to‘xtatilgani, yosh futbolchilar turar joyi yopilgani va oziq-ovqat bilan ta’minlash to‘xtatib qo‘yilgani, tarbiyalanuvchilar esa stadion hududidagi futbol maydonlariga uylaridan qatnab mashg‘ulot o‘tkazayotganliklari aytilgan.
“2017-yilgi mavsumda O‘FA tomonidan mamlakatning eng yaxshi akademiyasi deb topilgan «Nasaf” futbol maktabi bugun mana shunday qarovsiz ahvolda tursa… O‘zbek futboli dovrug‘iga hissa qo‘shgan Odiljon Hamrobekov, Azizjon G‘aniyev, Sharof Muhitdinov, Bobir Abdiholiqov, Islom Rashidxonov, Doniyor Narzullayev va yana boshqa bir qator iste’dodlarni yetkazib bergan akademiyaning bugungi ahvoliga shunchaki ko‘z yumib bo‘lmaydi.
Shu vaqtga qadar akademiyani klub o‘z budjetidan moliyalashtirib kelgan, ammo yaqin vaqt ichida “Nasaf”ning ahvoli ham tang ahvolga kelib qoldi. Klubning o‘rinbosarlari ham umuman ta’minotdan uzilib qolgan, ular istiqomat qilayotgan bazaning faoliyati ham to‘xtatilgan. Yoshlar ligasida o‘ynaydigan futbolchilar ham akademiya tarbiyalanuvchilari kabi uydan o‘yinlarga qatnashmoqda, Qolaversa Superliga 8-turida “Nasaf” safarda AGMK klubiga qarshi o‘ynaydi. Ushbu o‘yindan bir kun avval o‘tkazilishi rejalashtirilgan Yoshlar ligasi bahsida “Nasaf” yoshlari klubdagi inqiroz sabab bora olmasliklari ehtimoli katta.
Hattoki, klubning ikkinchi avtobusga yoqilg‘i to‘ldirishga ham qurbi yetmay qolganiga nima deysiz? Klubning asosiy tarkibi esa o‘yinlarga qarz evaziga borayotgani ham kishini havotirga solmoqda. Bundan ko‘rinib turibdiki, bosh homiy ham Qashqadaryoning Superligadagi yagona va bosh jamoasini moliyalashtirmay qo‘ygan» — deyiladi murojaatda.
Bugun, 24-aprel sanasida esa nashr “Nasaf” o‘rinbosarlari va futzal jamoasi safar o‘yinlariga bormasligi haqida xabar chop etdi. Qayd etilishicha, “Nasaf” Superliga 8-turi doirasidagi AGMKga qarshi safar o‘yiniga o‘rinbosarlar jamoasisiz boradi. Shuningdek, “Nasaf” futzal jamoasi ham “So‘g‘diyona”ga qarshi safar o‘yiniga bora olmaydi. Qolaversa, asosiy tarkib futbolchilarining Olmaliqdagi o‘yiniga matbuot xizmati ham olib ketilmaydi. PFL reglamentiga binoan esa klub bu ishi uchun moliyaviy jazoga tortiladi.
“Nasaf”dek katta klubning qisqa vaqt ichida bunday tang ahvolga tushib qolishi achinarli bo‘ladi. Agar vaziyat shunday davom etsa, Superliga ham “Nasaf”siz davom etishi mumkin. Bu esa rivojlanish bosqichidagi o‘zbek futboli uchun chinakam yo‘qotish bo‘ladi, deyiladi xabarda.
Izoh (0)