O‘zbekistonda futbolchilar ham endi doping nazoratidan o‘tadi

Joriy yilning 3-mart sanasida Prezident Shavkat Mirziyoyev Milliy antidoping agentligi faoliyatini tashkil etish to‘g‘risidagi qarorni imzolagan edi.

Ana shu qarordan kelib kelib chiqqan holda, O‘zbekiston milliy chempionatida halol futbolni targ‘ib qilish, turli qing‘irliklar va g‘irromliklarga barham berish maqsadida, futbolchilar o‘rtasida ham doping tekshiruvi yo‘lga qo‘yiladi. Bu haqda O‘FA matbuot xizmat ma’lum qildi.

Futbol uchrashuvlari yakuniga yetganidan keyin PFL rasmiy vakilining talabiga ko‘ra jamoadagi istalgan futbolchi (hattoki u maydonga tushmay, faqat zaxirada o‘tirgan bo‘lsa ham) doping tekshiruvi uchun olib qolinadi.

Bundan tashqari, doping tekshiruvini amalga oshiruvchi maxsus mutaxassislar istalgan jamoaning mashg‘ulotiga tashrif buyurib, istalgan futbolchini yoki butun jamoani doping tekshiruvidan o‘tkazish huquqiga ega bo‘ladi.

Tekshiruvlar natijasida, taqiqlangan moddalarni iste’mol qilgan futbolchilar aniqlansa, ularga nisbatan qat’iy jazo choralari qo‘llaniladi.