Shu yilning iyul oyida O‘zbekistonda yangi tug‘ilgan chaqaloqlarga mo‘ljallangan Ecola3000 inkubatorlarining ishlab chiqarilishi boshlanadi. Bu haqda “Gazeta.uz” xabar bermoqda.
Bu boradagi memorandum Toshkentda o‘tayotgan “Sog‘liqni saqlash — TIHE-2018” ko‘rgazmasida Foton Medical Quality O‘zbekiston – Shveysariya qo‘shma korxonasi va Xitoyning BNG Medical kompaniyasi o‘rtasida imzolandi.
Memorandum doirasida tomonlar, shuningdek, neonatologiya va pediatriyada ishlatiladigan yorug‘lik terapiyasi uskunalarini ishlab chiqarish bo‘yicha kelishuvga erishdi.
Loyihaning umumiy qiymati 3 million dollarni tashkil etadi. Boshlang‘ich bosqichda BNG Medical tomonidan yetkazib beriladigan texnologik murakkab butlovchi qismlardan foydalaniladi.
Yil oxiriga qadar korxona mahalliylashtirish darajasini 40 foizga, yillik ishlab chiqarish hajmini 500–600 donaga yetkazishni rejalashtirmoqda. Mahsulotning bir qismi eksport qilinadi.
Izoh (0)