Estoniyaning davlat boshqaruv vaziri Yaak Aab mast holda mashina boshqarib ketayotganda qo‘lga olinganidan so‘ng iste’foga chiqishga ariza berdi. Bu haqda u maxsus matbuot anjumanida ma’lum qildi, deb yozmoqda “Korrespondent.net”.
Ta’kidlanishicha, Aab o‘z iste’fosi haqida mamlakat bosh vazirini allaqachon ogohlantirgan.
Vazirning aytishicha, u hodisa uchun o‘zini oqlashga urinmaydi. U bundan dars olgan va boshqa haydovchilarni ham bu xatoni takrorlamaslikka chaqirgan.
Vazirning qo‘shimcha qilishicha, u avval spirtli ichimlik ichgandan so‘ng mashina boshqarmaslik prinsipiga doimo amal qilgan.
Xabar qilinishicha, politsiya vazirni 11-mart kuni Tartudan Tallinga ketayotgan vaqtda tezlikni oshirgani uchun ushlagan. U belgilangan tezlik 50 km/soat bo‘lgan yo‘lda 73 km/soat tezlikda harakatlangan. Qoidabuzar tekshirilganda, unng spirtli ichimlik ichgani ma’lum bo‘lgan.
Izoh (0)