Respublika ishchi guruhi tomonidan Jizzax viloyatining Mirzacho‘l tumanidagi “G‘alaba” mahallasida “Obod qishloq” dasturi doirasida keng ko‘lamli ishlar boshlandi. Bu haqda Facebook’dagi “Xalq bilan muloqot” guruhi xabar bermoqda.
Jumladan, hududdagi uy-joyga muhtoj oilalarga 160 ta namunaviy arzon uy-joy qurish uchun yer ajratildi. 112 ta uy 8 ta pudratchi qurilish tashkilotiga taqsimlab berildi.
15-aprel holatiga 120 ta uyda yer ishlari bajarilib, transheya qazildi. Beton-fundament ishlarini bajarish uchun zarur shag‘al va sement mahsulotlari peshma-pesh keltirilmoqda. Qurilish va ta’mirlash ishlariga Favqulodda vaziyatlar vazirligining 450 nafar harbiy xizmatchisi, 200 nafar shaxsiy tarkibi va 15 ta texnikasi jalb etildi. Uch smenada ish olib borilmoqda.
5,5 kilometr uzunlikdagi kuchlanishli elektr uzatish tarmoqlari va 2 ta transformator punktlarini yangi qurish, 18,3 kilometr uzunlikdagi kuchlanishli elektr uzatish tarmoqlari va 3 ta transformator punktlarini rekonstruksiya qilish, 9,9 kilometr uzunlikdagi kuchlanishli elektr uzatish tarmoqlari va 5 ta transformator punktlarini mukammal ta’mirlash rejalashtirildi.
5 kilometr gaz quvurini ta’mirlash, bo‘yash, 27 ta gaz taqsimlash punkti va 1800 ta gaz uskunasini taftish qilish rejalashtirildi. 48 ta gaz uskunasi taftish qilindi, 11,3 kilometr gaz quvuri demontaj qilindi.
Suv ta’minotini yaxshilash maqsadida 8,9 kilometr ichimlik suvi tarmog‘i yangidan o‘tkaziladi. Hozirda suv tarmog‘ini tortish uchun texnik tayyorlash ishlari olib borilmoqda.
1 kilometr kanalizatsiya tarmoqlari qayta ta’mirlash, 2,7 kilometr yangi tarmoq tortish rejalashtirilgan bo‘lib, bugungi kungacha 240 metr eski tarmoqda tozalash ishlari olib borildi.
Mahalladagi mavjud 16,6 kilometr yo‘llardan 10,3 kilometriga asfalt qoplamasi yotqiziladi. 717 metr uzunlikdagi eski lotoklar qazib olinib, yangi latok o‘rnatish uchun joylari tayyorlandi.
Tuman bo‘yicha jami 279 nafar fuqaro haq to‘lanadigan jamoat ishlariga jalb qilindi, ulardan 118 nafari “G‘alaba” mahallasida istiqomat qiladi.
Ko‘p qavatli uylarda yashovchi aholining chorva mollarini parvarishlash uchun 100 ta qoramol va 100 ta qo‘y boqishga mo‘ljallangan chorva kompleksi qurish ishlari boshlandi. Imtiyozli kredit asosida qoramol olish istagida bo‘lgan fuqarolar ro‘yxati shakllantirilib, kredit hujjatlarini rasmiylashtirish ishlari olib borilmoqda.
200 o‘rinli tikuvchilik sexi tashkil etish bo‘yicha joy tayyorlanib, ta’mirlash ishlari boshlab yuborildi. Ayni vaqtda tumandagi qishloq ho‘jalik kolleji bazasiga 18 ta tikuv mashinalari keltirilib, xotin-qizlarga tikuvchilik kurslari o‘tkazilmoqda.
Markaziy bank va tijorat banklari tomonidan 341 ta ish o‘rni yaratishga mo‘ljallangan 20 ta loyiha ishlab chiqilib, loyiha egalari bilan ishlanmoqda.
Izoh (0)