Республика ишчи гуруҳи томонидан Жиззах вилоятининг Мирзачўл туманидаги «Ғалаба» маҳалласида «Обод қишлоқ» дастури доирасида кенг кўламли ишлар бошланди. Бу ҳақда Facebook’даги «Халқ билан мулоқот» гуруҳи хабар бермоқда.
Жумладан, ҳудуддаги уй-жойга муҳтож оилаларга 160 та намунавий арзон уй-жой қуриш учун ер ажратилди. 112 та уй 8 та пудратчи қурилиш ташкилотига тақсимлаб берилди.
15 апрель ҳолатига 120 та уйда ер ишлари бажарилиб, траншея қазилди. Бетон-фундамент ишларини бажариш учун зарур шағал ва цемент маҳсулотлари пешма-пеш келтирилмоқда. Қурилиш ва таъмирлаш ишларига Фавқулодда вазиятлар вазирлигининг 450 нафар ҳарбий хизматчиси, 200 нафар шахсий таркиби ва 15 та техникаси жалб этилди. Уч сменада иш олиб борилмоқда.
5,5 километр узунликдаги кучланишли электр узатиш тармоқлари ва 2 та трансформатор пунктларини янги қуриш, 18,3 километр узунликдаги кучланишли электр узатиш тармоқлари ва 3 та трансформатор пунктларини реконструкция қилиш, 9,9 километр узунликдаги кучланишли электр узатиш тармоқлари ва 5 та трансформатор пунктларини мукаммал таъмирлаш режалаштирилди.
5 километр газ қувурини таъмирлаш, бўяш, 27 та газ тақсимлаш пункти ва 1800 та газ ускунасини тафтиш қилиш режалаштирилди. 48 та газ ускунаси тафтиш қилинди, 11,3 километр газ қувури демонтаж қилинди.
Сув таъминотини яхшилаш мақсадида 8,9 километр ичимлик суви тармоғи янгидан ўтказилади. Ҳозирда сув тармоғини тортиш учун техник тайёрлаш ишлари олиб борилмоқда.
1 километр канализация тармоқлари қайта таъмирлаш, 2,7 километр янги тармоқ тортиш режалаштирилган бўлиб, бугунги кунгача 240 метр эски тармоқда тозалаш ишлари олиб борилди.
Маҳалладаги мавжуд 16,6 километр йўллардан 10,3 километрига асфальт қопламаси ётқизилади. 717 метр узунликдаги эски лотоклар қазиб олиниб, янги латок ўрнатиш учун жойлари тайёрланди.
Туман бўйича жами 279 нафар фуқаро ҳақ тўланадиган жамоат ишларига жалб қилинди, улардан 118 нафари «Ғалаба» маҳалласида истиқомат қилади.
Кўп қаватли уйларда яшовчи аҳолининг чорва молларини парваришлаш учун 100 та қорамол ва 100 та қўй боқишга мўлжалланган чорва комплекси қуриш ишлари бошланди. Имтиёзли кредит асосида қорамол олиш истагида бўлган фуқаролар рўйхати шакллантирилиб, кредит ҳужжатларини расмийлаштириш ишлари олиб борилмоқда.
200 ўринли тикувчилик цехи ташкил этиш бўйича жой тайёрланиб, таъмирлаш ишлари бошлаб юборилди. Айни вақтда тумандаги қишлоқ ҳўжалик коллежи базасига 18 та тикув машиналари келтирилиб, хотин-қизларга тикувчилик курслари ўтказилмоқда.
Марказий банк ва тижорат банклари томонидан 341 та иш ўрни яратишга мўлжалланган 20 та лойиҳа ишлаб чиқилиб, лойиҳа эгалари билан ишланмоқда.
Изоҳ (0)