Yaponiyaning mashhur nashri “Asahi Shimbun” gazetasining ijodiy jamoasi joriy yilning 28-aprel – 6-may kunlari Qoraqalpog‘istonda ijodiy safarda bo‘ladi. Bu haqda O‘zA xabar bermoqda.
Tashrifdan maqsad – Orol dengizi haqida reportaj tayyorlash, shu jumladan Orolbo‘yining ekologik ahvolini o‘rganish, hududdagi muammolarni yechishda Yaponiya hukumati bilan xalqaro hamkorlik, shuningdek, donorlik tashkilotlar bilan ilmiy-akademik hamkorlik doirasida Yaponiya hamjamiyatining diqqat-e’tiborini ushbu muammolarni yechishga qaratish hamda kelgusida grant va texnik mablag‘larni jalb qilishni yo‘lga qo‘yishdir.
Yaponiyadagi eng yirik uchta nashrning biri hisoblangan “Asahi Shimbun” gazetasi (1879-yildan boshlab chiqib boshlagan)ga kelgusi yili 140 yil to‘ladi. Sakkiz million nusxada chop qilinadigan gazeta o‘z sahifalarida Yaponiyaning, shuningdek, dunyo davlatlarining siyosiy, iqtisodiy, ijtimoiy va madaniy-gumanitar sohalaridan materiallar tayyorlaydi.
Qayd etilishicha, yaqinda Buyuk Britaniyaning jahonga taniqli BBC teleradiokorporatsiyasining butun dunyo xizmati ijodiy jamoasi ham Orol muammosi haqidagi qisqa metrajli filmni suratga olgan edi.
Izoh (0)