Rossiyaning Sankt-Peterburg shahrida vafot etgan o‘zbekistonlik fuqaroning jasadi Yangiyo‘lga olib kelindi. Bu haqda O‘zbekiston Favqulodda vaziyatlar vazirligi matbuot xizmati xabar berdi.
Xabar berishlaricha, vazirlikning tezkor raqamiga fuqaro S.Gaibova murojaat qilib, kelini Yu.Sergeyeva Rossiyaning Sankt-Peterburg shahrida vafot etganligini ma’lum qilgan va uning jasadini O‘zbekistonga olib kelishda amaliy yordam so‘ragan.
“Ushbu holat yuzasidan tegishli vazirlik va idoralarga ma’lumot yetkazildi, Rossiya hamda O‘zbekiston hududlarida bir qator tadbirlar amalga oshirildi”, — deyiladi vazirlik axborotida.
O‘zbekiston Favqulodda vaziyatlar vazirligi “O‘zbekiston havo yo‘llari” milliy aviakompaniyasi hamda Toshkent viloyati hokimligi bilan birgalikda amalga oshirgan tashkiliy tadbirlar natijasida marhumaning jasadi 14-aprel kuni soat 6:30 da Rossiyadan Toshkentga olib kelingan.
“Jasad O‘zbekiston Sog‘liqni saqlash vazirligining maxsus avtomashinasida xalqaro aeroportdan Toshkent viloyatining Yangiyo‘l tumaniga — yaqin qarindoshlariga yetkazildi”, — deya qo‘shimcha qilingan FVV axborotida.
Izoh (0)