Россиянинг Санкт-Петербург шаҳрида вафот этган ўзбекистонлик фуқаронинг жасади Янгийўлга олиб келинди. Бу ҳақда Ўзбекистон Фавқулодда вазиятлар вазирлиги матбуот хизмати хабар берди.
Хабар беришларича, вазирликнинг тезкор рақамига фуқаро С.Гаибова мурожаат қилиб, келини Ю.Сергеева Россиянинг Санкт-Петербург шаҳрида вафот этганлигини маълум қилган ва унинг жасадини Ўзбекистонга олиб келишда амалий ёрдам сўраган.
«Ушбу ҳолат юзасидан тегишли вазирлик ва идораларга маълумот етказилди, Россия ҳамда Ўзбекистон ҳудудларида бир қатор тадбирлар амалга оширилди», — дейилади вазирлик ахборотида.
Ўзбекистон Фавқулодда вазиятлар вазирлиги «Ўзбекистон ҳаво йўллари» миллий авиакомпанияси ҳамда Тошкент вилояти ҳокимлиги билан биргаликда амалга оширган ташкилий тадбирлар натижасида марҳуманинг жасади 14 апрель куни соат 6:30 да Россиядан Тошкентга олиб келинган.
«Жасад Ўзбекистон Соғлиқни сақлаш вазирлигининг махсус автомашинасида халқаро аэропортдан Тошкент вилоятининг Янгийўл туманига — яқин қариндошларига етказилди», — дея қўшимча қилинган ФВВ ахборотида.
Изоҳ (0)