Андижон вилояти Бўз туманида ёнғин ўчириш қисмининг янги биноси фойдаланишга топширилди. Бу ҳақда «Дарё»га вилоят ИИБ ЁХБ матбуот хизмати хабар берди.
Ҳукуматнинг ёнғин хавфсизлиги тизимига қаратаётган эътибори туфайли туман марказида ушбу хизмат учун барча қулайликларга эга, бугунги кун талабларига тўла мос тушадиган замонавий бино қуриб берилди. Иншоот ёнғин ўчириш техникаси, жанговар шай ҳолатда турадиган махсус бокс, янги русумдаги ўт ўчириш анжомларига эга. Ёнғин хавфсизлиги бўлинмаси ва қисм бошлиғи, инспекторлар учун алоҳида хоналар ажратилган. Навбатчилик қисми замонавий алоқа воситалари ва видеокузатув билан таъминланган.Андижон вилоят ИИБ ЁХБ
Иншоотнинг очилиш маросими катта тантана билан бўлиб ўтди. Унда бўлинма ва қисм, вилоят, туман ички ишлар, ёнғин хавфсизлиги идоралари раҳбар ходимлари, тизимда узоқ йиллар ишлаган фахрийлар, давлат ва жамоат ташкилотлари вакиллари, қурувчилар иштирок этди. Иншоотни барпо қилган бинокорлар ҳамда ёнғин ўчириш қисмида фидокорона меҳнат қилаётганларга «Ташаккурнома» ва қимматбаҳо эсдалик совғалари топширилди. Рамзий калит бино эгасига топширилганидан кейин барча меҳмонлар иншоотни айланиш учун таклиф этилди.
Иншоотда навбатчиликда қоладиганлар учун ётоқхона ва ошхона жойлашган. Касбий ва жанговар тайёргарлигини ошириш учун ҳам махсус хоналар бўлиб, талаб даражасида жиҳозланган. Кутубхона, маънавият ва маърифат хоналари ҳам керакли адабиётлар, ўқув услубий қўлланмалар билан таъминланган.
Тумандаги ёнғин ўчириш қисми 1963 йилда ташкил этилиб, «хўжаликлараро ўт ўчириш қисми» деб аталган. Ўша даврда ўт ўчириш қисми тасарруфида «ЗИЛ-157» русумли автомобиль бўлган. 1976 йилда йўл қурилиш бошқармаси ҳудудига кўчирилиб, яна битта ўт ўчириш автомобили берилган. 1985 йили собиқ 1-қурилиш ташкилоти биносига ўтилганидан сўнг уни ўт ўчириш қисми шахсий таркиби ўз кучи билан таъмирдан чиқарган.
Туман ички ишлар бўлими ёнғин хавфсизлиги бўлинмаси ҳамда 18-касбийлашган ёнғин ўчириш қисмининг шу кунга қадар жойлашган биноси яроқсиз ҳолатга келиб, бугунги кун талабига жавоб бермай қолган эди.
Изоҳ (0)