Qirg‘iziston prezidenti Sooronbay Jeenbekovning topshirig‘i bilan “Dostuk-avtoyo‘l” nazorat-o‘tkazish punktidagi vaziyat muhokama qilindi, deb xabar beradi mamlakat davlat chegara xizmati matbuot xizmati. Buning uchun Qirg‘iziston hukumatining O‘sh viloyatidagi vakolatli vakili apparatida majlis tashkil qilindi va “Dostuk-avtoyo‘l” punkti ko‘zdan kechirildi.
Yig‘ilishda tegishli davlat organlari vakillari va idoralar rahbarlarining nazorat-o‘tkazish punktidagi vaziyatni yaxshilash bo‘yicha chora-tadbirlar haqidagi axboroti tinglandi. Ushbu punktning o‘tkazuvchanlik qobiliyatini oshirishga qaratilgan kompleks tadbirlar o‘tkazish haqida qarorlar qabul qilindi.
“Dostuk-avtoyo‘l” nazorat-o‘tkazish punktida shaxslar va transport vositalari juda ko‘p miqdorda to‘planib qolishi kuzatiladi, navbatlar har ikkala — Qirg‘iziston tomonida ham, O‘zbekiston tomonida ham qayd etiladi. O‘tkazish punktidan bir kecha-kunduzda 10 mingdan 12 ming nafargacha odam o‘tadi.
Qirg‘iziston prezidenti yuzaga kelgan vaziyatni o‘rganib chiqib, eng yaqin vaqt ichida punktning o‘tkazuvchanlik qobiliyatini oshirish va qirg‘iz-o‘zbek chegarasini kesib o‘tish sharoitlarini yaxshilash bo‘yicha choralar ko‘rishni talab qildi. Xususan, oqimni ajratib, chegaradan yuksiz o‘tayotgan fuqarolar uchun alohida yo‘lak yaratish topshirildi.
Izoh (0)