Қирғизистон президенти Сооронбай Жээнбековнинг топшириғи билан «Достук-автойўл» назорат-ўтказиш пунктидаги вазият муҳокама қилинди, деб хабар беради мамлакат давлат чегара хизмати матбуот хизмати. Бунинг учун Қирғизистон ҳукуматининг Ўш вилоятидаги ваколатли вакили аппаратида мажлис ташкил қилинди ва «Достук-автойўл» пункти кўздан кечирилди.
Йиғилишда тегишли давлат органлари вакиллари ва идоралар раҳбарларининг назорат-ўтказиш пунктидаги вазиятни яхшилаш бўйича чора-тадбирлар ҳақидаги ахбороти тингланди. Ушбу пунктнинг ўтказувчанлик қобилиятини оширишга қаратилган комплекс тадбирлар ўтказиш ҳақида қарорлар қабул қилинди.
«Достук-автойўл» назорат-ўтказиш пунктида шахслар ва транспорт воситалари жуда кўп миқдорда тўпланиб қолиши кузатилади, навбатлар ҳар иккала — Қирғизистон томонида ҳам, Ўзбекистон томонида ҳам қайд этилади. Ўтказиш пунктидан бир кеча-кундузда 10 мингдан 12 минг нафаргача одам ўтади.
Қирғизистон президенти юзага келган вазиятни ўрганиб чиқиб, энг яқин вақт ичида пунктнинг ўтказувчанлик қобилиятини ошириш ва қирғиз-ўзбек чегарасини кесиб ўтиш шароитларини яхшилаш бўйича чоралар кўришни талаб қилди. Хусусан, оқимни ажратиб, чегарадан юксиз ўтаётган фуқаролар учун алоҳида йўлак яратиш топширилди.
Изоҳ (0)