Ўзбекистон Президенти Шавкат Мирзиёев 2018 йилдан бошлаб вилоятларга сафарлари вақтида ўтказилаётган йиғилишларда ҳудуддаги ҳар бир туман вакиллари билан бевосита мулоқот қилмоқда, туман фаолларининг мурожаатлари ва илтимослари билан шахсан ўзи танишмоқда.
Бу анъана Президентнинг 19—20 январь кунлари Сурхондарёга амалга оширган ташрифидан бошланди. Қизириқда ўтган йиғилишда: «Шундай таклиф бор — ҳар бир туманнинг мурожаатларини тинглаймиз», — деганди Шавкат Мирзиёев. Мурожаатларни тинглаш Чироқчи ва Пешку йиғилишларида ҳам давом этди.
Президент раислигида ўтган учала йиғилишда туманлар вакиллари нималарни гапиргани ҳақида «Ўзбекистон 24» репортажлари орқали тасаввур ҳосил қилиш мумкин. Мурожаатлар турфа — кимдир йўллар таъмирталаб эканидан шикоят қилган, бошқа биров янги ишлаб чиқариш қувватлари ва ишчи ўринларини яратиш зарурлигини айтган, яна бир туманнинг вакили суғориш учун сув омбори қуришни сўраган.
Лекин мурожаатларнинг асосий қисми ичимлик суви муаммоси билан боғлиқ. Тўғри, Сурхондарёда йиғилишда ичимлик суви билан боғлиқ фақат битта мурожаат бўлди ва у ҳам, очиғини айтганда, миннатдорлик сўзлари эди. Бироқ Қашқадарё ва Бухородаги йиғилишларда муаммо бироз жиддийроқ экани сезилди.
Бойсун, Сурхондарё
Бойсундан сўз олган оқсоқол-ҳожи «аждодлар минг-минглаб йиллар давомида сув, сув, сув деб ўтиб кетгани»ни таъкидлаб, фақат Шавкат Мирзиёевнинг қароридан сўнг, Бойсундаги қатор қишлоқларни ичимлик суви билан таъминлашга доир лойиҳа бўйича ишлар олиб борилаётганини эслатиб ўтди.Ҳақиқатан ҳам, 2018 йил сентябри арафасида Бойсундаги «Хўжамайхона» булоғи суви туман марказига етиб бориши, тоғли туманга 36 километр масофадан тоза ичимлик суви олиб келиш учун 58 миллиард сўм маблағ йўналтирилгани ҳақида хабар берилган эди.
«Халқ мендан бир нарсани илтимос қилди: эй оқсоқол-ҳожи, сизга шундай имконият берилди, Президентимизга бизнинг номимиздан айтинг, тўрт-беш ойдан сўнг сув келганида, Президент Бойсунимизда меҳмон бўлсин, биздан ҳам бир пиёла сув ичсин», — деди бойсунлик отахон.
«Ўзбекистон 24»да эълон қилинган репортажга кўра, Шавкат Мирзиёев бу сўзларга шундай жавоб қайтарган: «Ҳақиқатан ҳам, сув масаласи — оғир масала. Қанчалик қийин бўлмасин, Худо хоҳласа, сув келади».
Деҳқонобод, Қашқадарё
Президент ҳозиргача Сурхондарё, Қашқадарё ва Бухоро вилоятларига ташриф буюрган бўлса, энг аянчли вазият Деҳқонободда экани маълум бўлди — туманнинг ичимлик суви билан таъминланганлик даражаси атиги икки фоизга тенг.«Маърузангизда ичимлик суви ҳақида гапирдингиз. Биз, деҳқонободликлар, тўғрисини айтганда, жуда ҳам хурсанд бўлдик. Чунки Деҳқонобод аҳлининг қарийб 100 йилдан буён, асрий орзусини биргина жасоратли қарорингиз билан рўёбга чиқардингиз», — деди Деҳқонобод номидан фикр билдирган ўқитувчи аёл.
Президент бунга жавобан тумандаги ичимлик суви билан боғлиқ вазиятни яхшилаш бўйича топшириқ берганини маълум қилди.
Деҳқонободликларнинг олдида менинг ҳам ўз ниятларим бор. Деҳқонободда ҳам, аста-секин бўлса-да, сизлар сезадиган даражада ўзгаришлар бўлади. Ичимлик суви таъминоти 2 фоиз эканини кўриб, жуда қийналдим. Қанчалар оғир бўлмасин, Худо хоҳласа, сизларга ичимлик суви етказиб бериш бўйича жуда қаттиқ ҳаракат қиламиз. Топшириқ бердим.Шавкат Мирзиёев, Ўзбекистон Президенти
Миришкор, Қашқадарё
Миришкор тумани вакили тоза ичимлик суви масаласи кўп йиллардан буён аҳолини ташвишга солаётгани, ҳудуддаги 113 минг аҳоли учун ичимлик сув асосан ташиб келтирилишини маълум қили. «Қувурлар эскириб, яроқсиз ҳолга келиб қолгани туфайли, баъзан ичимлик суви таъминотида узилишлар бўлиб, аҳоли техник сув ичишга мажбур бўлмоқда», — деди миришкорлик оқосоқол.Худо хоҳласа, бу масалани албатта ҳал қиламиз. Нимага десангиз, Қашқадарёда ичимлик суви масаласи жуда оғир. Жумладан, Миришкорда ҳам оғирлигини биламан.Шавкат Мирзиёев, Ўзбекистон Президенти
Муборак, Қашқадарё
Муборакда ҳам тоза ичимлик суви — ҳудуд аҳолисининг асрий орзуси экани айтилди. «Муборак шаҳридаги ичимлик суви муаммоси бизни қийнаб келади. Агар шаҳарда ичимлик суви муаммосини ҳал қилиб берсангиз, шаҳарда мевали ва манзарали дарахтлар эккан бўлардик», — деди туман фаоли.Мазкур мурожаат бўйича Президент йиғилишнинг ўзида Ўзбекистон Уй-жой коммунал хизмат вазирлиги раҳбари Музаффар Солиевга кўрсатма бериб, керак бўлса Вазирлар Маҳкамасининг қарорини ҳам чиқариб беришини таъкидлади.
Шофиркон, Бухоро
Шофирконлик оқсоқол учта масала бўйича мурожаат қилди, уларнинг бири ичимлик суви билан боғлиқ. «Шофиркон 25 фоизга ичимлик суви билан таъминланган, сув туман марказигача келган. Энди буни ҳудудларга, хонадонларгача етказиш муаммоси бор. Агар имконият бўлса, шу масала дастурларга киритилиб, охирига етказилса, халқимиз ичимлик суви билан таъминлашда ёрдам бўларди», — деди Шофиркон вакили.Президент ичимлик суви билан таъминланганлик даражаси бутун вилоят бўйича 51 фоизга тенглигини ва бу кўрсаткичга ҳам сўнгги бир йилда эришилганини таъкидлаб, Шофирконга бу масалада ёрдам кўрсатилишини, йиғилиш протоколига бу бўйича тегишли банд киритилишини айтди.
Жондор, Бухоро
Ичимлик суви таъминоти вилоятимизда 51 фоизни ташкил қилса, бизнинг туманимизда 28,9 фоизни ташкил этади. Қувурларнинг 60 фоиздан ортиғи таъмирталаб бўлиб қолган. Айниқса, Ромиш, Нуробод, Хумен, Пўлоти, Самончўғ, Хумданак ҳудудларимизда аҳоли учун сув манбалари йўқлиги сабаб, сув ташиб келтирилади. Амалий ёрдам берсангиз, янада хурсанд бўлардик.«Келтирган рақамларингиз — ҳақиқат. Буни ўзим ҳам биламан», — деб айтган Президент йиғилишнинг ўзида иқтисодиёт вазири биринчи ўринбосари Суннатилла Бекенов ва уй-жой коммунал хизмат вазири Музаффар Солиевга қувурларни янгилаш бўйича таклиф тайёрлаш ҳақида кўрсатма берган эди.
Когон тумани, Бухоро
Когон тумани номидан мурожаат қилган онахон ҳудудда «биттагина муаммо» борлигини айтиб, аҳолининг фақат 40 фоизи ичимлик суви билан таъминланганини, боз устига, ўтган асрнинг 70 йилларида ётқизилган сув қувурлари таъмирталаб ҳолга келиб қолганини билдирди.Президент қувурларнинг барини бирдан янгилаш бироз қийин эканини тан олди. Ўз навбатида, йиғилишда мутасаддиларга «керак бўлса, қўшимча пул ажратиш» йўли билан сув муаммосини ҳал қилиш лозимлигини уқтирди.
Изоҳ (0)