Shavkat Mirziyoyev Kogondagi chiqindini qayta ishlash korxonasi tashabbuskorlari va jamoasiga minnatdorlik bildirdi

O‘zbekiston Prezidenti Shavkat Mirziyoyev “Aholi trans” mas’uliyati cheklangan jamiyati faoliyati bilan tanishdi. Bu haqda Prezident matbuot xizmati xabar bermoqda.

Prezident 2017-yil 10—11-mart kunlari Buxoro viloyatiga tashrifi chog‘ida Kogon tumanida chiqindilarni saralash va qayta ishlash klasteri qurish loyihasi bilan tanishgan edi. Oradan bir yil o‘tmay loyiha ish boshladi.

Klasterga tumandagi bo‘sh turgan bino va inshootlar “nol” qiymatda berilgan. Binolar ta’mirlanib, Xitoydan bir kecha-kunduzda 450 tonna chiqindini qabul qilish quvvatiga ega texnologiya keltirib, o‘rnatildi.

Bu yerda metall, tosh, shisha, yaroqsiz rezina va avtoshinalar, plastmassa, yog‘och-taxta bo‘laklari, shox-shabbalar, makulatura, qurilish materiallari, matolar chiqindisi saralanadi. Ulardan briket, sintetik tola, qog‘oz karton, to‘qimachilik matosi, qurilish bloklari, biogumus va boshqa tayyor mahsulotlar ishlab chiqariladi.

400 dan ziyod ishchi mehnat qilayotgan korxona bugungi kunda Buxoro va Kogon shaharlari, Buxoro, Kogon tumanlaridagi maishiy chiqindilarni tashib keltirmoqda. Keyinchalik korxona faoliyatini kengaytirib, viloyatning barcha hududlarida paydo bo‘ladigan chiqindilarni yig‘ib keltirishni rejalashtirgan.

“Prezidentimiz klasterning mazkur rejalarini ma’qulladi”, — deyiladi rasmiy axborotda.

Shu paytgacha bu masala bilan hech kim shug‘ullanmagan edi. Chiqindi qayta ishlansa, tayyor mahsulotlar ishlab chiqariladi, ko‘plab ish o‘rinlari yaratiladi. Eng muhimi, ekologiyamiz toza bo‘ladi, keyinchalik suv va havo orqali aholi salomatligiga yetkazilishi mumkin bo‘lgan zararning oldi olinadi.

Shavkat Mirziyoyev, O‘zbekiston Prezidenti

Prezident korxona tashabbuskorlari va jamoasiga minnatdorlik bildirdi. Chiqindi yig‘ish qamrovi va qayta ishlash quvvatini yanada kengaytirish, shunday korxonalarni boshqa joylarda ham tashkil etish bo‘yicha ko‘rsatmalar berdi.