Toshkentda 14-fevral kuni O‘zbekiston Prezidenti Shavkat Mirziyoyev raisligida maktabgacha ta’lim tizimini isloh qilish chora-tadbirlari tahliliga bag‘ishlangan videoselektor yig‘ilishi o‘tkazildi.
Prezident o‘z nutqida Mustaqillikning ilk yilida O‘zbekistonda 1,5 millionga yaqin bolalar bog‘chaga borgan bo‘lsa, hozirga kelib bu ko‘rsatkich 500 mingga tushib qolganini qayd etdi va bu sohada qilinadigan ishlar ko‘p ekanini aytib o‘tdi.
Maktabgacha ta’lim sohasida ishlarimiz ancha orqada qolgan. 1991-yili O‘zbekistonda bolalarning bog‘chalar bilan qamrab olinishi darajasi 34—35 foizni tashkil etgan bo‘lsa, 2000-yilga kelib bu ko‘rsatkich 19 foizga tushib qolgan. Bu masala juda muhimligini va hozir qay darajada turganimizni hamma tushunishi kerak. Har bir viloyatning hokimi bu masalani o‘zi qo‘lga olib, uning hisob-kitobini joy-joyiga qo‘yishi kerak.Albatta, davlat-xususiy sherikchiligi — bizni hozirgi sharoitdan olib chiqib ketadigan, maqsadimizni ro‘yobga chiqaradigan yakka-yu yagona tizim, yo‘l. Bizda, mana, kollej-litseylar o‘zini oqlamadi. Uni tepasidagi ilmimiz, akademiyamiz yo‘q bo‘ldi. Nima uchun bu (maktabgacha ta’lim sohasiga e’tibor qaratish)ni qilyapmiz? Bu juda katta masala, kerak bo‘lsa, ertangi kunimizga zamin yaratyapmiz. Qanday? Asoslangan! Kimga? Bolalarimizga, kelajagimizga.
Kelajakni o‘ylab, ma’naviy va jismoniy jihatdan barkamol yosh avlodni tarbiyalashni maqsad qilgan har qanday davlat va jamiyat eng avvalo zamonaviy ta’lim tarbiya tizimini shakllantirishi kerak. Biroq mamlakatimizda yillar davomida ta’lim-tarbiyaning eng muhim bo‘g‘ini — maktabgacha ta’lim tizimiga mablag‘ ajratishni eng oxirgi darajadagi masala deb hisoblab kelingani sababli ushbu tizim juda og‘ir ahvolga tushib qolgani hech kimga bugun sir emas.
Bu kichkina siyosat emas, bu siyosat — ertangi kunimiz. 1991-yilda bizning 20 million xalqimiz bor edi, hozir 32 million. O‘shanda 1,5 millionga yaqin bolalarimiz bog‘chaga borardi, hozir esa 32 milliondan bor-yo‘g‘i 500 mingi bog‘chaga qatnaydi. Bu nimadan dalolat? Umuman hech kim bu soha bilan shug‘ullanmagan. Bu kamchiliklarni bosqichma-bosqich bartaraf etishimizning vaqti-soati keldi.
Shavkat Mirziyoyev, O‘zbekiston Prezidenti
Izoh (0)