Тошкентда 14 февраль куни Ўзбекистон Президенти Шавкат Мирзиёев раислигида мактабгача таълим тизимини ислоҳ қилиш чора-тадбирлари таҳлилига бағишланган видеоселектор йиғилиши ўтказилди.
Президент ўз нутқида Мустақилликнинг илк йилида Ўзбекистонда 1,5 миллионга яқин болалар боғчага борган бўлса, ҳозирга келиб бу кўрсаткич 500 мингга тушиб қолганини қайд этди ва бу соҳада қилинадиган ишлар кўп эканини айтиб ўтди.
Мактабгача таълим соҳасида ишларимиз анча орқада қолган. 1991 йили Ўзбекистонда болаларнинг боғчалар билан қамраб олиниши даражаси 34—35 фоизни ташкил этган бўлса, 2000 йилга келиб бу кўрсаткич 19 фоизга тушиб қолган. Бу масала жуда муҳимлигини ва ҳозир қай даражада турганимизни ҳамма тушуниши керак. Ҳар бир вилоятнинг ҳокими бу масалани ўзи қўлга олиб, унинг ҳисоб-китобини жой-жойига қўйиши керак.Албатта, давлат-хусусий шерикчилиги — бизни ҳозирги шароитдан олиб чиқиб кетадиган, мақсадимизни рўёбга чиқарадиган якка-ю ягона тизим, йўл. Бизда, мана, коллеж-лицейлар ўзини оқламади. Уни тепасидаги илмимиз, академиямиз йўқ бўлди. Нима учун бу (мактабгача таълим соҳасига эътибор қаратиш)ни қиляпмиз? Бу жуда катта масала, керак бўлса, эртанги кунимизга замин яратяпмиз. Қандай? Асосланган! Кимга? Болаларимизга, келажагимизга.
Келажакни ўйлаб, маънавий ва жисмоний жиҳатдан баркамол ёш авлодни тарбиялашни мақсад қилган ҳар қандай давлат ва жамият энг аввало замонавий таълим тарбия тизимини шакллантириши керак. Бироқ мамлакатимизда йиллар давомида таълим-тарбиянинг энг муҳим бўғини — мактабгача таълим тизимига маблағ ажратишни энг охирги даражадаги масала деб ҳисоблаб келингани сабабли ушбу тизим жуда оғир аҳволга тушиб қолгани ҳеч кимга бугун сир эмас.
Бу кичкина сиёсат эмас, бу сиёсат — эртанги кунимиз. 1991 йилда бизнинг 20 миллион халқимиз бор эди, ҳозир 32 миллион. Ўшанда 1,5 миллионга яқин болаларимиз боғчага борарди, ҳозир эса 32 миллиондан бор-йўғи 500 минги боғчага қатнайди. Бу нимадан далолат? Умуман ҳеч ким бу соҳа билан шуғулланмаган. Бу камчиликларни босқичма-босқич бартараф этишимизнинг вақти-соати келди.
Шавкат Мирзиёев, Ўзбекистон Президенти
Изоҳ (0)