O‘zbekiston Prezidenti Shavkat Mirziyoyev “Farmatsevtika tarmog‘ini jadal rivojlantirish bo‘yicha qo‘shimcha chora-tadbirlar to‘g‘risida” qaror qabul qildi. Bu haqda O‘zA xabar bermoqda.
Hujjatda Erkin iqtisodiy zonalar va kichik sanoat zonalari ma’muriy kengashlarining faoliyatini muvofiqlashtirish bo‘yicha Respublika kengashi, Sog‘liqni saqlash, Iqtisodiyot, Tashqi savdo vazirliklari, Investitsiyalar bo‘yicha davlat qo‘mitasi, Sog‘liqni saqlash vazirligi huzuridagi Farmatsevtika tarmog‘ini rivojlantirish agentligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining farmatsevtika tarmog‘ini rivojlantirish borasidagi faoliyati qoniqarsiz deb topildi.
Ishda jiddiy kamchiliklarga yo‘l qo‘yganligi va lozim darajadagi tashabbuskorlik yo‘qligi sababli Farmavsevtika tarmog‘ini rivojlantirish agentligi direktori Z.Do‘sanov va mazkur agentlik direktorining birinchi o‘rinbosari M. Do‘smuratov egallab turgan lavozimidan ozod etildi.
Qarorga muvofiq, “Nukus-farm”, “Zomin-farm”, “Kosonsoy-farm”, “Sirdaryo-farm”, “Boysun-farm”, “Bo‘stonliq-farm” va “Parkent-farm” erkin iqtisodiy zonalaridagi haqiqiy vaziyatni o‘rganish va mavjud muammolarni hal etish bo‘yicha ishchi guruhlar tuziladi. Har bir erkin iqtisodiy zonaga Qoraqalpog‘iston Respublikasi va tegishli viloyatlar prokurorlari biriktiriladi.
O‘zbekiston Respublikasi Sog‘liqni saqlash vazirligiga tuman (shahar) tibbiyot birlashmalari, ko‘p tarmoqli, shahar va qishloq oilaviy poliklinikalari, shuningdek, qishloq vrachlik punktlarida ijtimoiy dorixonalarni joylashtirish imkoniyatini o‘rganish, o‘tkazilgan o‘rganishlarni inobatga olgan holda, 2018-yil 1-aprelga qadar ijtimoiy dorixonalarning joylashuvini tasdiqlash topshirildi.
Moliya vazirligiga dori vositalari va tibbiy buyumlarni ishlab chiqarish uchun xom ashyoni import qilishda qo‘shimcha qiymat solig‘i bo‘yicha imtiyozni qo‘llash mexanizmini soddalashtirish yuzasidan Vazirlar Mahkamasiga takliflar kiritish topshirildi.
Bunda tasdiqlangan ro‘yxat asosida imtiyoz qo‘llash tartibi istisno qilinib, dori vositalari va tibbiy buyumlarni tayyorlash uchun olib kiriladigan, respublikada ishlab chiqariladigan xom ashyo va substansiyalarga qo‘shimcha qiymat solig‘i bo‘yicha imtiyozlar qo‘llanilmasligi nazarda tutiladi.
Izoh (0)