17 ta qotillik va 15 ta bosqinchilik hujumlari uchun sudlangan “GTA bandasi” a’zolari O‘zbekistonda harbiy to‘ntarishni rejalashtirgan, deb yozadi “Nuz.uz” “Novaya gazeta”ga tayanib. Nashr ma’lumotlariga ko‘ra, jinoiy to‘da boshliqlari aka-uka Subhonovlar soxta pasportlar bo‘yicha Rossiyada yashab kelgan.
Ulardan biri — Holiq Subhonov so‘roq chog‘ida ukasi bilan birga O‘zbekistonda harbiy to‘ntarishni rejalashtirganini tan oldi. Ataylab shuning uchun ular Pokistondagi mashg‘ulot lagerida jihodchilar guruhida tayyorgarlikdan o‘tgan. 2012-yilda Holiq O‘zbekistonda ekstremizm ayblovi bo‘yicha qidiruvga berilgan.
Podmoskovyeda aka-ukalar odamlarni yollash bo‘yicha ishlarni boshlagan, shuningdek, jangovar guruh yig‘gan. Moskva viloyatida barcha jinoyatlar pul uchun amalga oshirilgan — to‘da boshliqlari orttirilgan pulni harbiy ehtiyojlar uchun Pokistonga yuborgan, shuningdek, o‘z vatanlarida harbiy to‘ntarishni rejalashtirgan.
Ayni paytda “GTA bandasi” ishi Moskva viloyat sudida ko‘rib chiqilmoqda. Sudlanuvchilar besh kishidan iborat. Guruhning yana to‘rt a’zosi 2017-yilning avgustida suddan qochishga urinish chog‘ida o‘ldirilgan edi. O‘ldirilganlar orasida Holiq Subhonov ham bo‘lgan. Uning ukasi esa 2014-yil noyabrida Podmoskovyeda qo‘lga olish operatsiyasi vaqtida halok bo‘lgan.
Jinoiy guruh Qirg‘iziston, O‘zbekiston va Tojikiston fuqarolaridan iborat kamida 15 kishini o‘z ichiga olgani ma’lum. Guruh Grand Theft Auto kompyuter o‘yinlari “sharafiga” nomlangan.
Izoh (0)