Ўзбекистонда фармацевтикани ривожлантириш бўйича ишлар қониқарсиз деб топилди ва соҳага масъул агентлик раҳбари ишдан олинди

Ўзбекистон Президенти Шавкат Мирзиёев «Фармацевтика тармоғини жадал ривожлантириш бўйича қўшимча чора-тадбирлар тўғрисида» қарор қабул қилди. Бу ҳақда ЎзА хабар бермоқда.

Ҳужжатда Эркин иқтисодий зоналар ва кичик саноат зоналари маъмурий кенгашларининг фаолиятини мувофиқлаштириш бўйича Республика кенгаши, Соғлиқни сақлаш, Иқтисодиёт, Ташқи савдо вазирликлари, Инвестициялар бўйича давлат қўмитаси, Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг фармацевтика тармоғини ривожлантириш борасидаги фаолияти қониқарсиз деб топилди.

Ишда жиддий камчиликларга йўл қўйганлиги ва лозим даражадаги ташаббускорлик йўқлиги сабабли Фармавсевтика тармоғини ривожлантириш агентлиги директори З.Дўсанов ва мазкур агентлик директорининг биринчи ўринбосари М. Дўсмуратов эгаллаб турган лавозимидан озод этилди.

Қарорга мувофиқ, «Нукус-фарм», «Зомин-фарм», «Косонсой-фарм», «Сирдарё-фарм», «Бойсун-фарм», «Бўстонлиқ-фарм» ва «Паркент-фарм» эркин иқтисодий зоналаридаги ҳақиқий вазиятни ўрганиш ва мавжуд муаммоларни ҳал этиш бўйича ишчи гуруҳлар тузилади. Ҳар бир эркин иқтисодий зонага Қорақалпоғистон Республикаси ва тегишли вилоятлар прокурорлари бириктирилади.

Ўзбекистон Республикаси Соғлиқни сақлаш вазирлигига туман (шаҳар) тиббиёт бирлашмалари, кўп тармоқли, шаҳар ва қишлоқ оилавий поликлиникалари, шунингдек, қишлоқ врачлик пунктларида ижтимоий дорихоналарни жойлаштириш имкониятини ўрганиш, ўтказилган ўрганишларни инобатга олган ҳолда, 2018 йил 1 апрелга қадар ижтимоий дорихоналарнинг жойлашувини тасдиқлаш топширилди.

Молия вазирлигига дори воситалари ва тиббий буюмларни ишлаб чиқариш учун хом ашёни импорт қилишда қўшимча қиймат солиғи бўйича имтиёзни қўллаш механизмини соддалаштириш юзасидан Вазирлар Маҳкамасига таклифлар киритиш топширилди.

Бунда тасдиқланган рўйхат асосида имтиёз қўллаш тартиби истисно қилиниб, дори воситалари ва тиббий буюмларни тайёрлаш учун олиб кириладиган, республикада ишлаб чиқариладиган хом ашё ва субстанцияларга қўшимча қиймат солиғи бўйича имтиёзлар қўлланилмаслиги назарда тутилади.