Tojikiston O‘zbekistonga asosan xom ashyo tovarlari o‘rin olgan eksport mahsulotlari ro‘yxatini taqdim etdi. Bu haqda mamlakat sanoat va yangi texnologiyalar vaziri Shavkat Bobozoda ma’lum qildi, deya xabar beradi Asia-Plus.
“Hozirda sanoat hamkorligi bo‘yicha ikki davlat ishchi guruhi faoliyat olib bormoqda. Uning ishi doirasida eksportga yo‘naltirilgan sanoat mahsulotlarimiz ro‘yxatini tayyorladik va hamkorlarimizga taklif etdik”, — deydi Shavkat Bobozoda.
Vazirga ko‘ra, ro‘yxatga birlamchi alyuminiy, ruda, paxta tolasi, elektr energiyasi, sement, qayta ishlanmagan teri, pilla, ipak, gilamlar, turli matolar, meva va quruq mevalar, ichimliklar kiritilgan.
Bobozoda o‘tgan yili tojik mahsulotlarining O‘zbekistonga eksporti o‘zbek mahsulotlarining Tojikistonga importi bilan deyarli teng miqdorda bo‘lganini bildirdi.
Rasmiy statistik ma’lumotlarga ko‘ra, 2017-yilda ikki davlat o‘rtasidagi tovar aylanmasi 82 foizga oshib, 126 million dollarga yetdi.
Bundan 69 million dollari O‘zbekistonda ishlab chiqarilgan mahsulotlarning Tojikistonga eksporti, 57 million dollari esa Tojikistonda tayyorlangan mahsulotlarning O‘zbekistonga eksporti hissasiga to‘g‘ri keldi.
Izoh (0)