Latviya turistik agentligi va operatorlari assosatsiyasi tashkil etgan 25-xalqaro “Balttour 2018” ko‘rgazma yarmarkasida dunyoning 40 dan ziyod mamlakatlari qatori O‘zbekistondan Farg‘ona viloyatining turizm sohasiga daxldor 25 kishilik delegatsiyasi qatnashdi. Bu haqda “Daryo” muxbiri Muhammadjon Obidov xabar bermoqda.
Delegatsiya tarkibidan viloyat muttasaddi tashkilotlari rahbarlari, viloyatdagi mehmonxona menejerlari, turoperatorlar, hunarmandlar, faol tadbirkorlar, oshpazlar va milliy folklor ansambli ishtirokchilari joy oldi.
Riga shahrida bo‘lib o‘tgan “Balt-tur” turistik yarmarkasining rasmiy ochilish marosimida Farg‘ona viloyati hokimining o‘rinbosari M.Abdurahmonov viloyatning turistik imkoniyatlari, yaratilgan shart-sharoitlar, imkoniyatlar to‘g‘risida taqdimot o‘tkazdi.
Viloyat delegatsiya a’zolari Riga shahri meri o‘rinbosari Maksim Tolstoy tomonidan qabul qilindi. Unda turizmni rivojlantirish istiqbollari muhokama etildi.
Yarmarkaning viloyat uchun ajratilgan stendi milliy hunarmandchilik mahsulotlari, jumladan Marg‘ilonning atlas va adrasi, do‘ppilar, Rishtonning kulolchilik maxsulotlari bilan bezatildi. Shuningdek, viloyatda ishlab chiqarilayotgan vino mahsulotlari degustatsiyasiga uzluksiz taklif etib turildi. Yarmarkasi doirasida Farg‘ona viloyati hokimi Shuhrat G‘aniyev ishtirokida “Farg‘ona viloyati madaniyat kuni” nishonlandi.
Farg‘ona viloyati turizmni rivojlantirish boshqarmasi boshlig‘i M.Temirov va “Latviya turistik agentlari va operatorlari assotsiatsiya” ijrochi direktori Astridi Trupovniyetse o‘rtasida turizm sohasida hamkorlik qilish, o‘zaro sayyohlar almashinuvini yo‘lga qo‘yish, ikki tarafning turistik salohiyatini aks ettiruvchi reklama mahsulotlarini targ‘ib qilish to‘g‘risida memorandum imzolandi.
Izoh (0)