Mudofaa vazirligi markaziy apparatida O‘zbekiston Yoshlar ittifoqining boshlang‘ich tashkilotini tuzish bo‘yicha ta’sis yig‘ilishi bo‘lib o‘tdi. Bu haqda vazirlik matbuot xizmati xabar bermoqda.
Yig‘ilishda mudofaa vazirining harbiy-vatanparvarlik, ma’naviy-axloqiy tarbiya va yoshlar bilan ishlash bo‘yicha o‘rinbosari polkovnik Azizbek Ikramov, O‘zbekiston Yoshlar ittifoqi Markaziy kengashi raisining birinchi o‘rinbosari Odiljon Tojiyev hamda mudofaa vazirligi mas’ul ofitserlari ishtirok etdi. Dastlab O‘zbekiston Yoshlar ittifoqining yarim yillik faoliyatiga bag‘ishlangan videolavha namoyish etildi.
Yig‘ilishda O‘zbekiston yoshlar ittifoqining Mudofaa vazirligi boshlang‘ich tashkiloti kengashi raisi va kengashning 5 nafar a’zolari ochiq ovoz berish yo‘li orqali saylandi. O‘zbekiston Yoshlar ittifoqi Markaziy kengashi raisining birinchi o‘rinbosari Odiljon Tojiyev O‘zbekiston yoshlar ittifoqi mudofaa vazirligi boshlang‘ich tashkiloti kengashi raisi mayor Sardor Abdusamatovga tantanali ravishda Yoshlar ittifoqi guvohnomasini topshirdi.
Boshlang‘ich tashkilot kengashiga saylangan harbiy xizmatchilar o‘z ish dasturlarini yig‘ilish ishtirokchilariga yetkazdi.
Izoh (0)