Toshkentdagi Xalqaro hamkorlik markazida 13-fevral kuni iqtisodiy hamkorlik masalalari bo‘yicha O‘zbekiston – Janubiy Koreya birinchi qo‘shma majlisi bo‘lib o‘tdi. Bu haqda O‘zA xabar bermoqda.
Tadbirda ikki mamlakatning tashqi savdo, sarmoya, bank-moliya, yoqilg‘i-energetika, neft-gaz, mashinasozlik, transport va transport kommunikatsiyalari, qurilish, kimyo va oziq-ovqat sanoati, to‘qimachilik, qishloq va suv xo‘jaligi, fan-ta’lim, axborot texnologiyalari va telekommunikatsiyalar, tibbiyot hamda sayyohlik kabi sohalar uchun mas’ul vazirlik va idoralari, kompaniya va konsernlari rahbarlari ishtirok etdi.
O‘zbekiston bosh vaziri Abdulla Aripov, Janubiy Koreya bosh vaziri o‘rinbosari, strategiya va moliya vaziri Kim Dong Yon va boshqalar mamlakatlar o‘rtasidagi iqtisodiy hamkorlik izchil mustahkamlanib borayotganini alohida ta’kidladi.
Tadbirda O‘zbekiston – Janubiy Koreya hamkorligini yangi mazmun bilan boyitish, ishbilarmon doiralarning muloqoti va qo‘shma loyihalarini qo‘llab-quvvatlashdan ikki tomon ham birdek manfaatdor ekani ta’kidlandi.
Majlis davomida tomonlar O‘zbekiston va Janubiy Koreya hukumati o‘rtasida qabul qilingan Iqtisodiy hamkorlik jamg‘armasi kreditlari to‘g‘risidagi shartnoma doirasidagi 2018–2020-yillarga mo‘ljallangan loyihalarni amalga oshirishning borishini ko‘rib chiqdi.
Anjumanda Toshkent shahrida Koreya Respublikasi ilg‘or texnologiyalar instituti (KIAT) bilan hamkorlikda O‘quv-amaliy to‘qimachilik texnoparki va O‘zbekiston – Koreya biznes-markazi tashkil etish, Koreya madaniyati va san’ati uyini ochish va boshqa masalalar muhokama qilindi.
Tadbir so‘ngida tibbiy sog‘lomlashtirish majmuasi qurish bo‘yicha hamkorlik to‘g‘risida anglashuv memorandumi imzolandi.
Izoh (0)