Farg‘ona viloyatida Qur’on musobaqasining 19 ta shahar-tuman hududiy bosqichida qatnashish uchun 1244 nafar ishtirokchi — 716 nafar erkak, 528 ayol ro‘yxatga olindi. Bu haqda viloyat hokimligi matbuot xizmati “Daryo”ga ma’lum qildi.
Musobaqa ikki yo‘nalishda hifz (Qur’oni karimni to‘liq yod olish), tilovat (go‘zal va ravon qiroat qilish) bo‘yicha olib borilmoqda.
Quvasoy shahar bosh imom-xatibi Alisher Naimovning qayd etishicha, ishtirokchilarning ma’naviyati, kiyinishi, odobi, o‘zini tutishi kabi talablar ham inobatga olinmoqda.
Quvasoydagi “Islom” jome’-masjidida 1-hudud bo‘yicha Farg‘ona, Quvasoy shaharlari, Quva, Farg‘ona va So‘x tumanlaridan 205 nafar musobaqa ishtirokchisi, 600 nafardan ziyod tinglovchi yig‘ildi.
Marg‘ilon shahar “Xonaqoh” jome’ masjidida o‘tkazilgan Qur’on musobaqasida hududda istiqomat qiluvchi 127 nafar ishtirokchi va mingdan ziyod tinglovchi jam bo‘ldi.
Qo‘shtepa tumani “Muborak” jome’ masjidida ayollar o‘rtasidagi Qur’on musobaqasining hududiy bosqichi bo‘lib o‘tdi. Unda Toshloq, Yozyovon va Qo‘shtepa tumanlaridan tashrif buyurgan 57 nafar xotin-qiz Qur’oni karim suralarini go‘zal qiroat bilan o‘qidi.
Musobaqaning shahar-tuman bosqichlari 7 ta hudud bo‘yicha Qo‘qon shahar “Degrezlik”, Oltiariq tumani “Shoh Tolib”, Buvayda tumani “Salmoni Forsiy” masjidlarida, O‘zbekiston tumani “Umid” to‘yxonasida bo‘lib o‘tmoqda.
Izoh (0)