Фарғона вилоятида Қуръон мусобақасининг 19 та шаҳар-туман ҳудудий босқичида қатнашиш учун 1244 нафар иштирокчи — 716 нафар эркак, 528 аёл рўйхатга олинди. Бу ҳақда вилоят ҳокимлиги матбуот хизмати «Дарё»га маълум қилди.
Мусобақа икки йўналишда ҳифз (Қуръони каримни тўлиқ ёд олиш), тиловат (гўзал ва равон қироат қилиш) бўйича олиб борилмоқда.
Қувасой шаҳар бош имом-хатиби Алишер Наимовнинг қайд этишича, иштирокчиларнинг маънавияти, кийиниши, одоби, ўзини тутиши каби талаблар ҳам инобатга олинмоқда.
Қувасойдаги «Ислом» жомеъ-масжидида 1-ҳудуд бўйича Фарғона, Қувасой шаҳарлари, Қува, Фарғона ва Сўх туманларидан 205 нафар мусобақа иштирокчиси, 600 нафардан зиёд тингловчи йиғилди.
Марғилон шаҳар «Хонақоҳ» жомеъ масжидида ўтказилган Қуръон мусобақасида ҳудудда истиқомат қилувчи 127 нафар иштирокчи ва мингдан зиёд тингловчи жам бўлди.
Қўштепа тумани «Муборак» жомеъ масжидида аёллар ўртасидаги Қуръон мусобақасининг ҳудудий босқичи бўлиб ўтди. Унда Тошлоқ, Ёзёвон ва Қўштепа туманларидан ташриф буюрган 57 нафар хотин-қиз Қуръони карим сураларини гўзал қироат билан ўқиди.
Мусобақанинг шаҳар-туман босқичлари 7 та ҳудуд бўйича Қўқон шаҳар «Дегрезлик», Олтиариқ тумани «Шоҳ Толиб», Бувайда тумани «Салмони Форсий» масжидларида, Ўзбекистон тумани «Умид» тўйхонасида бўлиб ўтмоқда.
Изоҳ (0)