Axborot texnologiyalarini ishlab chiqish va joriy qilishni qo‘llab-quvvatlash bo‘yicha Mirzo Ulugbek Innovation Center innovatsiya markazi tomonidan talabalarning AKT sohasida O‘zbekistondagi yetakchi korxonalarda amaliyot o‘tashini tashkil qilish ishlari amalga oshirilmoqda, deb xabar berdi O‘zA.
Toshkent shahridagi Inha universiteti talabalari bu imkoniyatdan birinchilardan bo‘lib foydalanish, o‘qish davomida olgan bilimlarini tajribada sinab ko‘rish, mahalliy AKT korxonalari faoliyati bilan tanishish imkoniyatiga ega bo‘ldi. Amaliyot o‘tayotgan talaba uch oy mobaynida o‘z bilim va ko‘nikmasi, yuklatilgan vazifalarni bajarishni uddalay olishini namoyon qilishi kerak.
Universitet rektori Sarvar Boboxo‘jayevning ta’kidlashicha, talabalarning mamlakatdagi ixtisoslashgan korxonalarda ishlab chiqarish amaliyotini o‘tashi ularga o‘z ishi va axborot-texnologiyalari bozorining alohida xususiyatlarini chuqur o‘zlashtirish, hayotidagi muhim bosqichga qadam qo‘yish hamda o‘z professional faoliyatini boshlash imkonini beradi.
Toshkent shahridagi Inha universitetining sakkiz nafar talabasi Toshkentdagi 2005-yildan buyon internet-loyihalar va dasturiy mahsulotlar ishlab chiqarishga ixtisoslashgan DataSite Technology kompaniyasida tajriba o‘tamoqda. Bu yerda talabalar ta’lim olish bilan birga, muhim texnologik loyihalarni amalga oshirishga ham jalb qilingan. Bunda ularning har biriga o‘z yo‘nalishi bo‘yicha malakali mutaxassis biriktirilgan.
“Talabalar ishimizga tez va oson moslashishi uchun xodimlarimiz bilan til topishish, mahsulotlarimizning ishlab chiqarish spetsifikasi bilan tanishishga xizmat qiluvchi maxsus trening tashkil etildi. Amaliyot tugagach, har bir talabaning yutug‘i va professional sifatlari baholanadi, eng yaxshi talabalarga kompaniyamizdan ish taklif qilinadi”, — deydi DataSite Technology kompaniyasining HR-mutaxassisi G.Qoraboyeva.
Axborot texnologiyalarini ishlab chiqish va joriy qilishni qo‘llab-quvvatlash bo‘yicha Mirzo Ulugbek Innovation Center innovatsiya markazi oliy ta’lim muassasalari va kasb-hunar kollejlarining “axborot texnologiyalari” mutaxassisligi bo‘yicha bitiruvchilarini ishga joylashtirishni ta’minlash, jumladan, iqtidorli yoshlar tomonidan startap loyihalarini amalga oshirishda ularni qo‘llab-quvvatlash yo‘li bilan faol ishtirok etmoqda.
Izoh (0)