“Sirdaryo” chegara bojxona postida Qozog‘iston fuqarosi Yerjan Sabitovga (ism-sharifi shartli) tegishli qo‘l yuklari xolislar ishtirokida bojxona nazoratidan o‘tkazildi. Bu haqda O‘zA xabar bermoqda.
Unda jami uchta sellofan paketga o‘ralgan yashil rangli, o‘ziga xos o‘tkir hidli, nasha giyohvand moddasiga o‘xshash mahsulot borligi aniqlandi.
— Ye. Sabitov bergan ko‘rsatmalarida yonidan topilganlar nasha o‘simligi ekani, o‘zi iste’mol qilish uchun olib o‘tayotganini bayon qildi, — deydi viloyat bojxona tekshiruvlari va surishtiruv bo‘limi bosh inspektor-surishtiruvchisi Tohir Fayziyev. — Xolislar ishtirokida unga nisbatan tegishli protsessual hujjatlar rasmiylashtirilib, uning yonidan topilgan giyohvand moddasiga o‘xshash mahsulot ashyoviy dalil sifatida olinib, viloyat IIB ekspert-kriminalistika bo‘limiga yetkazildi. Mutaxassislarning xulosasiga ko‘ra, u marixuana moddasi ekani ma’lum bo‘ldi.
Hozirda mazkur holat bo‘yicha Yerjan Sabitovga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Izoh (0)