O‘zbekiston Respublikasi Ichki ishlar vazirligi Migratsiya va fuqarolikni rasmiylashtirish bosh boshqarmasi yangi binoga ko‘chishi munosabati bilan bir qator xizmatlari vaqtincha to‘xtatiladi, deb xabar berdi Toshkent shahar IIB matbuot xizmati.
Quyidagi xizmatlarning ko‘rsatilishi 2018-yilning 5-fevral kunidan 11-fevraliga qadar butun respublika bo‘yicha vaqtincha to‘xtatiladi:
1. O‘zbekiston Respublikasi fuqarosining biometrik pasporti hamda fuqaroligi bo‘lmagan shaxsning xorijga chiqish hujjatini rasmiylashtirish yuzasidan hujjatlarni qabul qilish va elektron talabnoma shakllantirish;
2. Jismoniy shaxslarga shaxsiy identifikatsiya raqamini biriktirish yuzasidan hujjatlarni qabul qilish va elektron talabnoma shakllantirish;
3. O‘zbekiston Respublikasi fuqarolariga chet elga chiqish ruxsat yozuvi stikerini rasmiylashtirish;
4. Chet el fuqarolari va fuqaroligi bo‘lmagan shaxslarga O‘zbekiston Respublikasida yashash guvohnomasini rasmiylashtirish;
5. Chet el fuqarolarini O‘zbekiston Respublikasiga taklif qilish yuzasidan hujjatlarni rasmiylashtirish;
6. O‘zbekiston Respublikasi fuqarolarini Toshkent shahri va Toshkent viloyatida turgan joyi bo‘yicha hisobga olish to‘g‘risida qayd varag‘ini rasmiylashtirish.
Migratsiya va fuqarolikni rasmiylashtirish bosh boshqarmasi Toshkent shahar, Yakkasaroy tumani, Shota Rustaveli 1-berk ko‘chasi, 5-uy manziliga ko‘chmoqda.
Izoh (0)