Samarqandning Registon maydonidagi bo‘sh turgan hujralarda qahvaxona va mehmonxona xizmatlari tashkil etilishi maqsadga muvofiq bo‘ladi. Ispaniya sanoat, energetika va turizm vazirligi xalqaro bo‘limi boshlig‘i Mariya Anxeles Martines Mingesa Samarqandga tashrifi chog‘ida shunday taklif bildirdi, deya xabar beradi Turizmni rivojlantirish davlat qo‘mitasi matbuot xizmati.
Uning ta’kidlashicha, bunday xizmatlar Ispaniyadagi madaniy meros obyektlarida keng tarqalgan.
Shuningdek, Mariya Anxeles Ulug‘bek rasadxonasi hududida yulduzlarni kuzatish uchun maydonlar tashkil etish, sayyohlar selfi tushishi uchun maxsus joylarni ko‘paytirish, mehmonxonalar, savdo do‘konlarida o‘zbek milliy liboslarini ijaraga berish tizimini yo‘lga qo‘yishni ham taklif qildi.
Ispaniyalik mehmonga ko‘ra, hunarmandlar markazlarida san’at namunalari, ovqatlanish obyektlarida taom pishirish jarayonida sayyohlarning bevosita ishtirok etishini yo‘lga qo‘yish, madaniy meros obyektlarida faoliyat ko‘rsatayotgan gidlarning tarixiy qahramonlar liboslarida yurishlarini tashkil etish ham foydadan xoli bo‘lmaydi.
Izoh (0)