AQShda gripp epidemiyasi tarqalmoqda

AQShda ketma-ket uchinchi hafta gripp bilan og‘riganlar soni ortib bormoqda, deb yozadi “Korrespondent.net”.

Epidemiya Gavayi orollaridan tashqari barcha shtatlarni qamrab olgan.

Qayd etilishicha, o‘tgan hafta shifokorlarga murojaat qilgan har o‘n beshinchi kishi gripp simptomlaridan aziyat chekkan. Bu 2009-yildagi pandemiyadan so‘ng eng katta ko‘rsatkich.

Kasallanishning mazkur darajasi saqlanib qolsa, mavsum oxiriga borib 34 million amerikalik grippga chalinadi.

Joriy yilda eng keng tarqalgan H3N2 virusi mavsumiy shtamm bo‘ldi. 2009-yilda H1N1 shtammi (“cho‘chqa grippi”) epidemiyani keltirib chiqargan edi.

H3N2 shtammi “cho‘chqa grippi”dan ham xavfliroq ekanligi aytilmoqda. Sababi, unga vaksina deyarli ta’sir qilmaydi.