O‘zA Toshloq tumani bozorlaridagi noxush holatlar, xususan, sotuvchi va xaridorlar uchun sharoitlar yo‘qligini tanqid qilgandi. Bunga tumani hokimi H.Umarov javob xati yo‘lladi.
Unda, jumladan, shunday deyiladi:
“Dehqon bozori’ mas’uliyati cheklangan jamiyati 2019-yilda qayta ta’mirlash bo‘yicha dasturga kiritilgan bo‘lib, viloyat hokimligi tomonidan joriy yilda qurilish ishlarini bajarish rejalashtirildi. Shuningdek, har ikki hududni obodonlashtirish, sanitariya holatini yaxshilash, sotuvchi va xaridorlar uchun yetarli sharoitlar yaratish ishlari amalga oshirish boshlandi. Tuman davlat soliq inspeksiyasi tomonidan ‘Fayz baraka’ savdo kompleksi va uning atrofidagi 6 ta savdo shoxobchasiga bank terminali va nazorat kassa mashinalari o‘rnatildi. Bugungi kunda kompleks hududida savdo bilan shug‘ullanayotganlar soni 34 tani tashkil qilmoqda. Qolgan savdo rastalarida ‘Dehqon bozorlari va savdo komplekslari faoliyatini tashkil qilishni takomillashtirish to‘g‘risida’gi qaror asosida ishlab kelinmoqda. Har ikki bozorning yillik tushum rejasi ortig‘i bilan bajarilishi ta’minlanmoqda. Joriy yilda imkoniyatdan kelib chiqib, tushumlarni ko‘paytirish tadbirlari olib boriladi”.
O‘zA muxbiri bularni joyiga borib ko‘rdi va jarayon bilan tanishdi. Darhaqiqat, ayni paytda bozordagi holat viloyat davlat soliq boshqarmasi tomonidan nazoratga olingan. Tadbirkorlarga barcha sharoitlarni yaratish, savdo xizmati ko‘rsatishni yanada yaxshilash, savdoni qonuniy asosda yo‘lga qo‘yish maqsadida chora-tadbirlar rejasi ishlab chiqildi.
Tuman “yo‘l xaritasi”ga ham har ikki bozordagi muammolarni hal qilish, tadbirkorlarni yanada keng jalb etish, banklar bilan uchrashuvlar o‘tkazish kabi masalalar kiritildi. Shuningdek, joriy yilda “Dehqon bozori” o‘rnida yangi loyihalar asosida zamonaviy gipermarket bunyod etish ishlarini boshlash, bu yerdagi noqonuniy savdo shoxobchalarini olib tashlash bo‘yicha tadbirlar belgilandi.
Izoh (0)