ЎзА Тошлоқ тумани бозорларидаги нохуш ҳолатлар, хусусан, сотувчи ва харидорлар учун шароитлар йўқлигини танқид қилганди. Бунга тумани ҳокими Ҳ.Умаров жавоб хати йўллади.
Унда, жумладан, шундай дейилади:
«Деҳқон бозори’ масъулияти чекланган жамияти 2019 йилда қайта таъмирлаш бўйича дастурга киритилган бўлиб, вилоят ҳокимлиги томонидан жорий йилда қурилиш ишларини бажариш режалаштирилди. Шунингдек, ҳар икки ҳудудни ободонлаштириш, санитария ҳолатини яхшилаш, сотувчи ва харидорлар учун етарли шароитлар яратиш ишлари амалга ошириш бошланди. Туман давлат солиқ инспекцияси томонидан ‘Файз барака’ савдо комплекси ва унинг атрофидаги 6 та савдо шохобчасига банк терминали ва назорат касса машиналари ўрнатилди. Бугунги кунда комплекс ҳудудида савдо билан шуғулланаётганлар сони 34 тани ташкил қилмоқда. Қолган савдо расталарида ‘Деҳқон бозорлари ва савдо комплекслари фаолиятини ташкил қилишни такомиллаштириш тўғрисида’ги қарор асосида ишлаб келинмоқда. Ҳар икки бозорнинг йиллик тушум режаси ортиғи билан бажарилиши таъминланмоқда. Жорий йилда имкониятдан келиб чиқиб, тушумларни кўпайтириш тадбирлари олиб борилади».
ЎзА мухбири буларни жойига бориб кўрди ва жараён билан танишди. Дарҳақиқат, айни пайтда бозордаги ҳолат вилоят давлат солиқ бошқармаси томонидан назоратга олинган. Тадбиркорларга барча шароитларни яратиш, савдо хизмати кўрсатишни янада яхшилаш, савдони қонуний асосда йўлга қўйиш мақсадида чора-тадбирлар режаси ишлаб чиқилди.
Туман «йўл харитаси»га ҳам ҳар икки бозордаги муаммоларни ҳал қилиш, тадбиркорларни янада кенг жалб этиш, банклар билан учрашувлар ўтказиш каби масалалар киритилди. Шунингдек, жорий йилда «Деҳқон бозори» ўрнида янги лойиҳалар асосида замонавий гипермаркет бунёд этиш ишларини бошлаш, бу ердаги ноқонуний савдо шохобчаларини олиб ташлаш бўйича тадбирлар белгиланди.
Изоҳ (0)